sábado, 18 de agosto de 2012

Dr. Mari Alkatiri: “Maske Iha Kritika Maibe Ho Nonok, Tamba Hakarak Kontribui Ba Lia Loos”

.

Notisia Husi TVTL - Sesta-Kalan, 17 Agustu 2012

Eis Primeiru Ministru Dr. Mari Alkatiri hateten, nia lakohi nonok atu amate istoria ba jerasaun foun.

Dr. Mari Alkatiri hateten, nia tenki koalia maske dala ruma ema kritika ba nia personalidade.

Sekretariu Jeral partidu FRETILIN, Dr. Mari Alkatiri hato’o kestaun ne’e, bainhira partisipa iha seminariu loron ida ho topiku “Hare Ba Kotuk Hakta Ba Futuru” ne’ebe organiza husi Asosiasaun Oan Kiak FALINTIL iha salaun Parokia Becora.

“Tamba ne’e mak hau nonok, nonok, nonok, nonok, to’o tinan rua ba kotuk mak hau tenki koalia fali, tamba hau hare katak, hau nia silensiu rasik sei regula ita nia istoria ne’e hodi hatudu lia loos, hau kuandu koalia ema balun dehan hau promosi hau nia an, hau mos hetan duni kritika balun katak, kuandu hau hatudu, balun dehan foti nia an, maibe ita tenki pasensia kuandu ita hakarak kontribui ba lia loos, hodi hasoru kontradiksi hirak ne’e,” dehan Mari Alkatiri.

Nune’e, Prezidenti Asosiasaun FOK-FALINTIL Armando da Silva afirma, jerasaun foun agora la dun hatene istoria luta ba independensia tamba mosu istoria ho versaun oioin.

“Jerasaun foun la dun hatene istoria tamba mosu vrsaun oioin, hau lahatene atu tuir loos versaun ida ne’ebe,” dehan Armando.

Armando da Silva hateten, sira nia asaun atu kompleta no habelar tan serviso estadu hodi buka valoriza saudozo sira ho dignidade.
.

Sem comentários:

Publicar um comentário

Nota: só um membro deste blogue pode publicar um comentário.