segunda-feira, 27 de agosto de 2012

Estanislau Aleixo da Silva: “FRETILIN ‘Apoiu’ PN Sosa Kareta Foun”

.

Jornal Timor Post - Sabadu, 25 Agustu 2012

“Ami La simu kareta mos povu la vota nafatin mai ami, tinan hira nia laran ami sa’e ami nia kareta mos ema bolu ami beik ten tan,” Dehan Deputadu FRETILIN, Estanislau Aleixo da Silva ba Jornalista sira, Sesta (24/08) iha uma fukun Parlamentu Nasional.

Tuir nia, maioria povo seidauk senti sakrifisiu ne’ebe deputadu FRETILIN sira halo durante peiordu tinan lima ba kotuk.

“Uluk ami ho ami nia kareta rasik, a’at mos ami hadia rasik ho ami nia osan, maibe ema la hare baa mi nia sakrifisiu ida ne’e, entaun ami sakrifika bebeik ida ne’e ba halo saida,” eis Primeira Ministra ne’e afirma.

Maibe deklarasaun ne’ebe deputdau ne’e halo seidauk iha desizaun, nia dehan, Partidu FRETILIN sei la desidi ho emosaun maibe ho realista par abele halo servisu hanesan deputdau ho diak liu tan.

“Agora ami tenki haree didiak, tanba situasaun agora la hanesan, uluk ne’e situasaun politiku oin seluk, agora situasaun politiku oin seluk, agora ami tenki halo balansu, benefisiu saida mak ami la hetan wainhira ami la la’o ho kareta foun, e benefisiu saida mak ami hetan se ami la’o ho kareta foun,” hatutan nia.

Deputadu Estanislau mos kompara, se karik ho kareta foun sei iha posiblidade ba liu tan foho para kontaktu liu tan ho eleitoradu maibe ne’e seidauk desidi, tanba ita hare katak CNRT ho nia kareta foun, kadeira sa’e tan, entaun dala-ruma FRETILIN bele hasa’e nia kadeira wainhira deputadu sira simu kareta foun karik.

“Portantu buat sira ne’e hotu ami tenki hare halo didiak, ami lakohi desizaun ida ne’ebe ho emosaun, desizaun ne’ebe realistu, desizaun ne’ebe halo ajuda, halo servisu hanesan deputadu ninian ne’ebe halo diak liu tan,” dehan Deputadu FRETILIN Estanislau Aleixo da Silva.
.

Sem comentários:

Publicar um comentário

Nota: só um membro deste blogue pode publicar um comentário.