sexta-feira, 24 de agosto de 2012

Lamentasaun Deputadu: “Diskursu Estadu Uza Lian Tetun”

.

Jornal Nasional Diario - Sesta-Feira, 24 Agustu 2012

Membru Parlamentu Nasional husu ba lideransa nasaun nian wainhira halo diskursu estadu uza lian tetun atu nune’e povu tomak bele kumpriende saida mak lideransa sira hato’o.

“Diak liu iha serimonia estadu ita nia deskursu halo ho tetun para povu TL bele rona hotu laos uza fali lian portugues, maske iha konsituisaun RDTL hakerek lian Portugues sai lian ofisial hamutuk ho lian tetun, maibe atu implementa tenki haree mos ba kondisaun no situasuan povu nian,” dehan deputadu husi Bancada PD Vergilio Hornai ba JNDiaro (23/8) iha PN, bainhira fo komentariu ba diskursu Prezidenti PN ho lian Portugues ne’ebe transmisaun direta husi RTTL maibe povu la kumpriende.

Virgilio Hornai nuudar Prezidenti Komisaun F ne’ebe trata asuntu kona ba Edukasaun, Saude, Kultura, Jeneru no veteranus hateten, bainhira iha diskursu formal ruma povu presiza hatene saida mak TL nia rekomendasaun ba lideransa nasaun seluk, laos atu rona jestu koalia lian ne’e.

“Serimonia formal ruma tenki koalia ka diskursu ho lian tetun para ema hotu rona, laos ema ida rua mak atu rona,” dehan Hornai.

Alien de ne’e mos, deputadu husi Bancada FRETILIN Inacio Moreira hato’o mos nia preokupasaun ba ida ne’e, tanba povu iha foho ne’eba hakarak atu rona saida mak nia lideransa sira hato’o ba Sekretariu Jeral ONU nian.

“Ita koalia lian rua ne’e hotu, maibe to’o tempu hasoru povu ita tenki uza lian ne’ebe povu hatene, labele prejudika fali sira nia direitu atu hetan informasaun,” tenik nia.

Ba kestaun ne’e, antes ne’e Prezidenti PN Vicente Guterres hateten, se mak hateten povu Timor Leste la hatene lian portuguesa, taba ne’e ami tenki uza lian ofisial rua ne’e (Portugues ho tetum).
.

Sem comentários:

Publicar um comentário

Nota: só um membro deste blogue pode publicar um comentário.