quarta-feira, 7 de novembro de 2012

Evita Falsifikasaun Veteranus Falsu: “Veteranus Sei Halo Juramentu”

.

Jornal Timor Post - Kuarta-feira, 07 Novembru 2012 

Sekretariu Estadu Asuntu veteranus, Julio Sarmento “Meta Malik” hateten, nia apresia tebes ho programa juramentu ba mate restu 12 Novembru, tanba ne’e, nia hanoin veteranu sira mos tenki halo juramentu. 

 “Hau apresia tebes ho serviso Komite 12 Novembro nian hodi realiza juramentu iha Bairu-bairu, tanba ne’e, hau hanoin tenki halo mos ba veteranu sira,” Meta Malik hato’o lia hirak ne’e ba Timor Post, hafoin remata akompania juramentu mate restu 12 Novembru iha Lahane Oriental, foin lalais ne’e. 

Nia esplika, objetivu husi veteranu atu halo juramentu para salva estadu no governu nia osan no detekta veteranu ne’ebe loos no falsu hodi hatudu lia loos. 

Meta Malik informa, wainhira la konsege justifika veteranus iha tinan 2013, nia sei rekomenda ba Major Jeneral Lere Anan Timor atu haruka ninia veteranu sira iha F-FDTL atu tun hotu kedas hodi hala’o serviso no hatudu provas konkretu ba veteranus ne’ebe loos. 

Entertantu, Maijor jeneral Lere Anan Timor hateten katak, nia pronto atu haruka ninia veteranu sira apoiu servisu hodi justifika veteranus loos, tanba durante ne’e sira barak mak dezempregu hela. 

Nia hatutan, iha 2003 lista veteranus iha totalidade 75 mill, maibe sira ne’ebe mak hetan ona diretu atu simu osan iha banku hamutuk 17.800 ital. Iha parte seluk, Prezidenti Republika Taur Matan Ruak promulga ona orsamentu ho montante U$ 26,9 mill ne’ebe governu propoin no hetan aprovasaun husi Parlamentu Nasional atu fo subsidiu ba Kombatentes LIbertasaun Nasional Timor Leste. 
,

Sem comentários:

Publicar um comentário

Nota: só um membro deste blogue pode publicar um comentário.