quarta-feira, 7 de novembro de 2012

Falta Kombustivel Ba Ambulansia; “Pasiente 2 Mate Iha Lospalos”

.

Jornal Nacional Diario - Kuarta-feira, 07 Novembru 2012 

Reprezetante povu iha uma fukun Parlamentu Nasional (PN), husi bancada FRETILIN, Aurelio Guterres informa katak, pasiente nain 2 mate iha Distritu Lospalos foin lalais tanba laiha osan atu ense kombustivel ba kareta ambulansia hodi evakua pasiente refere mai Hospital referral Baucau

Deputadu Aurelio haktuir katak, pasiente nain rua ne’ebe mak mate iha Hospital Lospalos ne’ feto no mane ida. Nia hatutan katak, inan feton ne’ebe mate, tanba hahoris Bebe impaktu husi ran nakfakar, no Doutor especialista sira fo autorizasaun atu evakua inan feton ne’e mai Hospital Baucau, maibe la konsege tamba kombustivel laiha. 

“Pasiente ita nia inan feton ne’e hein kuaze semana rua nia laran, la evakua mai hospital baucau, no pasiente ne’e hakoru iis iha Lospalos,” katak deputadu Aurelio Guterres husi Bancada FRETILIN ba Jornalista, Tersa (06/11), iha Parlamentu Nasional. 

Nia hatutan, situasaun hanesan mos akontese ba pasiente mane maluk ne’ebe mate, tanba nia kapasidade laiha atu ense kombustivel ba kareta Ambulansia entaun husi nia to’o mate deit. 

 “Tanba sa mak kombustivel iha Hospital sira ne’e laiha? Osan mak laiha hodi hola mian fahe ba 13 Distritu ka oinsa? Hodi fasilita povu kiik sira nia moris ba saude,” dehan nia. 

Nia dehan, problema ne’e akontese tamba jestaun Ministeriu Saude nian mak la diak iha parte logistika nian, nune’e fo impaktu ba pasiente mate. 

Nune’e mos, akontesementu ida ne’e ba pasiente ida iha Sub Distritu Uatulari, Distrito Viqueque iha fulan kotuk liuba, atu evakua mai Hospital Nasional Guido Valadares (HNGV), maibe enfermeira sira dehan Gazolina laiha entaun obriga pasiente selu U$ 30 dola Amerikanu, atu ense mina ba ambulansia atu bele tula nia mai HNGV. 

Ba kestaun ne’e, Deputadu husi Bankada PD, Virgilio Hornai reforsa katak, problema saude ne’e problema ida ne’ebe ita tenki rejolve para labele fo fali impaktu ba pasiente sira.
.

Sem comentários:

Publicar um comentário

Nota: só um membro deste blogue pode publicar um comentário.