segunda-feira, 19 de novembro de 2012

Kazu MJ Dioniso Babo ho Luisa da Costa rejistu ona iha Prokuradoria Jeral

.

Radio Liberdade - Segunda, 19 Novembru 2012 - Ekipa www.radioliberdadedili.com 

Radio, online - 19 Novembru, 2012, Prokuradoria Jeral Distritu Dili rejista ona kazu violensia hasoru feto Luisa da Costa ne’ebé involve Ministru Justisa, Dionsio Soares Babo. 

Kazu ne’e rejistu ho numeru Nuc 1089/PD DIL. Tuir karta ne’ebé haruka ba sasin Antonio Aitahan Matak, Prokuradór Internasionál ne’ebé mak kaer kazu ne’e mak Baltazar Ramos. 

Koalia ba www.radioliberdadedili.com, Aitahan Matak hateten, kazu ne’e tenta rezolve liu husi dalan mediasaun no liu husi familia parte rua nian, maibe la konsege, entau ne’e presiza liu husi dalan legal. 

 “Ha’u ho Irmaun Jeca Faulara tenta nu’udar tiu no parte CNRT nian halao mediasaun hodi rezolve kazu ne’e, maibe la konsege,” nia haktuir. 

Aitahan Matak esplika liu tan, loloos kazu ne’e rezolve liu husi dalan mediasaun, maibe tamba sai ona iha jornal no parte ida dehan ne’e la justu, entau kazu ne’e tenke lori ba tribunal. 

 “Kuandu ne’e sai fali iha jornal, mak ida fali foti dehan ne’e la justu tuir lia kultural nian mak sinora [Luisa] lori fali kazu ne’e ba tribunal. Ohin ha’u iha ne’e para atu sai testamuina ba kazu ne’e,” nia hateten. 

Nia dehan nia nunka hanoin atu ba fó deklarasaun, maibe tamba hetan samada husi prokuradór sira, entau nia tenke kumpri hodi fó sasin tamba iha momentu kazu ne’e akontese nia ba kedas óspital nasionál Guido Valadares hodi haree kondisaun vitima nian. 

“Kazu ne’e kona-ba Luisa ho Sr. Dionisio Babo nian. Ha’u sai testamuinu tamba ha’u haree vitima iha óspital,” nia afirma. 

Kordenador Jeral CPD-RDTL ne’e mós hateten, parte vitima deklara katak nia hetan baku no parte suspeitu dehan nia la baku, entau dalan di’ak liu mak tenke liu husi tribunal, nune’e bele hetan lia loos. 

 “Ida dehan baku no ida fali dehan nia la baku ne’ebé ami la bele rezolve katak ida hetan baku ne’e tenke obriga para hatene ou ida baku ne’e tenke obriga para nega tiha ninia buat ida ne’e. Entau tenke mai iha lia loos para halo loos,” nia esplika. 

Tuir eis Luta Nain ne’e, kazu ne’e iha oin tolu mak suspeitu komete, primeiru mak baku vitimia nia hirus matan, segundu nia la tau matan ba labarik no terseiru mak cerai [divorsiu]. 

“Problema iha oin tolu, primeiru mak basa ninia hirus matan. Problema rua nia la haree labarik no problema tolu mak cerai. Nia la rekuinese feto, maibe hakarak deit oan. Tamba ne’e Sra. Luisa la sente kontente, nune’e nia lori kazu ne’e mai tribunal,” nia hateten. 

Eis prizonieru politika ne’e mós hateten momentu iha óspital nia haruk sms [mesajen] kedas Sr. Agio Pereira, Prezidente Konseilu Ministru kona-ba kazu ne’e. 

Hatan ba Aitahan Matak ninia sms, Agio Pereira dehan, “favor ida senor bele ba haree tók mak ita fó hatene ba malu,” Aitahan Matak haktuir. 

Kazu ne’e akontese iha loron 5 Setembru bainhira vitima [Luisa] ho ninia oan ba vizita ministru ninia serbisu fatin. 

Antes kazu ne’e lori ba prosesu legal, Dionisio Babo liu husi jornal Timor Post, Independente no Diario Nacional katak, nia nunka baku feto ida, maibe respeitu no tane aas feto nia dignidade. 

 Iha parte seluk Primeiru Ministru Xanana Gusmao iha ninia intevensaun bainhira halo aprezentasaun ba programa Governu Kintu Konstitusional iha Parlamentu Nasional, fulan Setembru liu ba hateten, nia fó ‘zero toleransia’ ba sei deit mak halo violensia hasoru feto ho labarik. 
.

Sem comentários:

Publicar um comentário

Nota: só um membro deste blogue pode publicar um comentário.