terça-feira, 20 de novembro de 2012

PR Taur husu eis kombatentes no veteranus hamrik iha liña oin funu hasoru ki'ak no mukit

.

Radio Liberdade - Segunda, 19 Novembru 2012 - Santino Dare Matia 

Radio, online - Prezidente Repúblika Taur Matan Ruak akompaña ho membru governu balun hanesan; Ministra Solidaridade Sosial,Vice Ministru Edukasaun Ensinu Báziku, Vice Ministra Saude Asuntu Étika profesional, no Sekretariu Estadu Obras Públikas,Sesta-feira dader ne'e husik sub-distritu Uatucarbau hodi kontinua vizita ba sub-distritu Iliomar, distritu Lautem hodi hala'o dialóguba loron dalima nian ho komunidade sira iha sub-distritu refere. 

Durante intervensaun Xefe Estadu husu ba eis kombatentes no veteranus sira atu hatudu dala ida tan sakrifisiu hodi hamrik iha liña oin funu hasoru ki'ak no mukit iha rai laran hanesan uluk hatudu ona iha tempu rezistensia ne'ebé sakrifika-an funu hasoru okupasaun ilegal nasaun seluk nian, tamba objetivu ba liberta povu seidauk atinji. 

Iha dialógu ne'e Xefe Estadu mós preokupa tamba ohin loron disiplina lakon tiha ona iha sosiadade nia leet, halo ema la respeitu maluona. 

Ho ne'e Xefe Estadu subliña atu nasaun ou sosiadade sira labele anarkitu, tenke hamoris fila-fali disiplina iha sosiadade nia leet nune'e ema bele fiar malu no respeita malu fila-fali, maibe ne'e la signifika Estadu atu uza ditadura. 

Entretantu kestoens no preokupasoens ne'ebé komunidade sira levanta durante dialógu nia laran hanesan; falta bee moos, problemas idozu, husu hadi'a irigasaun ira bere, fo ajuda ambulansia ba iha sub-distritu Iliomar, husu rehabilita estrada ligasaun hosi kapital distritu ba sub-distritu Iliomar hodi liga ba sub-distritu Uatucarbau. 

Husu mos monta postuF-FDTL marina nian iha kosta sul hodi kontrola peskas ilegal. Iha biban ne’e komunidade mos aprovieta levanta problema kona-ba promesa Primeiru Ministru kona-ba uma lima kada aldeia ne'ebé to'o ohin loron seidauk implementa. 

Problemas falsifikasaun dadus veteranus, husu estadu oinsa konsidera ba komunidade ne'ebé uluk suporta aihan ba guerileirus sira, estatutu professores voluntarius nian, kualidade prozetu PDL, PDD no preokupasoens seluk tan. 

Hafoin dialógu remata, Xefe Estadu ho delegasaun kontinua ba aledia Namalutu ne'ebé pertense ba sub-distritu Iliomar nian, hodi haree fatin ne'ebé iha tempu rezistensia uja hanesan subar fatin funu hasoru militar Indonezia.
.

Sem comentários:

Publicar um comentário

Nota: só um membro deste blogue pode publicar um comentário.