sexta-feira, 23 de novembro de 2012

Samson Hetan Mandatu Kapturasaun; “PNTL Tau Borgol Ba Eis Diretor LABEH”

.

Jornal Timor Post - Sesta-feira, 23 Novembru 2012 

Polisia Nasional Timor Leste (PNTL), Kinta (22/11), tau borgol ba eis diretor LABEH Cristopher Henry Samson hodi lori ba Comarka Becora-Dili, tanba halo falsifikasaun dokumentus sai sidadaun Timor, iha imazen ne’e, Cristopher hiit liman ba Jornalista sira no obrgol iha liman molok sa’e kareta komarka nian iha edifisiu Tribunal Distrital Dili (TDD) nia oin. 

Eis Diretor ONG Lalenok Ba Ema Hotu (LABEH), Cristopher Henry Samson hetan ona mandatu kapturasaun husi polisia hodi ba kumpri nia sentensa iha prizaun Becora durante tinan 3 fulan 6, mandatu kapturasaun ne’ebe hasai husi Ministeriu Publiku Polisia ezekuta iha 22 Novembru 2012. Samson sei kumpri desizaun Tribunal hahu iha loron 22 Novembru 2012 to’o 22 Maiu 2015, maibe, depende ba eis diretor ne’e nia komportamentu iha prizaun, karik hatudu komportamentu diak nia bele kumpri deit pena to’o fulan 21 ka tinan 1 fulan 9 ou pena sorin balun husi desizaun Tribunal nian. 

Cristopher Henry Samson hafoin selu kustu judicial iha Tribunal Distrital Dili informa ba jornalista sira katak, nia kumpri desizaun Tribunal no prepara an hodi ba kumpri sentensa iha sela prizaun Becora. 

Samson husu ba nia staf inklui Diretor foun Gil Julio da Silva atu kontinua luta hasoru korupsaun iha nasaun Timor Leste tanba realidade nia ba hela prizaun la’os kriminozu maibe tanba konspirasaun politik no la gosta nia hakilar bebeik kazu korupsaun ne’ebe akontese iha governu laran. 

Nune’e, nia la tauk atu ba kumpri desizaun ikus Tribunal nian no nia nunka halai husi responsablidade, no nia kontinua luta hasoru tanba nia isin mak tau iha prizaun maibe nia hanoin kona ba korupsaun sei la tau iha prizaun. 

Entertantu, tuir Advogado Pedro Aparicio ne’ebe fo asistensia legal hateten katak, desizaun ultimo ne’e nia la satisfas tanba justisa ba nia kliente laiha, maibe nia fiar iha loron ida sei deskobre hikas verdade refere. 

Nia dehan, kazu refere tama kategoria konspirasaun politika, tanba nia kliente koalia maka’as sobre korupsaun altura Governu FRETILIN, no tama iha governu AMP, ema ne’ebe kaer kna’ar iha Ministeriu Publiku mos FRETILIN entaun tenki kontinua prosesu atu bele halo kontenti ba parte sira nia akuzasaun. 

Aparicio haktuir tan katak, Tribunal Rekursu la aprova katak, nia kliente la’os ema Timor oan ka laos moris iha Timor, tan ne’e, nia fiar deportasaun ba nia kliente la akontese, tanba diferensia idade ho nia alin Miguel Afonso maka Tribunal konsidera ida ne’e. 
.

Sem comentários:

Publicar um comentário

Nota: só um membro deste blogue pode publicar um comentário.