terça-feira, 20 de novembro de 2012

“Tenki Foti Medidas Ba CPD-RDTL”

.

Jornal Timor Post - Segunda, 19 Novembru 2012 

Reprejetante povu iha Parlamentu Nasional (PN) husu ba Polisia Nasional Timor Leste (PNTL), tenki foti medidas ba atividades grupu CPD-RDTL ne’ebe halo paniku no hatauk povu iha baze. 

Prezidente Komisaun B Parlamentu nasional, Maria Lurdes hateten katak, CPD-RDTL oras ne’e hala’o movimentu iha Distritu manufahi, Bobonaro, Viqueque no Lospalos halo povu paniku no tauk. 

“Loron rua ba kotuk, ami simu informasaun direta mai husi povu Distritu Manufahi, Bobonaro, Viqueque, Lospalos katak, agora dadaun CPD-RDTL halo movimentu halo povu paniku no tauk, ne’ebe komisaun B hola inisiativa hodi bolu Sekretariu Estado Seguransa (SES), no Sekretariu Estadu Defeza mai iha PN iha komisaun B hodi esplika loloos situasaun iha terenu la’o oin sa, no ami husu polisia tenki kontrola sira nia movimentu,” Maria informa ba Timor Post iha uma fukun, Sesta (16/11). 

Maria informa liu tan katak, ita nia lei rasik hateten, nasaun Timor Leste iha deit instituisaun rua (Polisia Nasional Timor Leste ho F-FDTL) no instituisaun rua ne’e mak bele hatais farda, tantu farda Polisia no farda militar. 

Tan ne’e, laiha dalan atu CPD-RDTL halo atividade hanesan military, uza sasan kroat hodi hatauk povu, hadau povu nia rai, halo kobransa illegal, no halo tuir deit sira nia hakarak no la tuir ona lei ne’ebe preve ona iha nasaun Timor Leste. 

Nune’e mos deputada husi Bancada CNRT Maria Rosa Camara ‘Bisoi’ la dun satisfeitu ho movimentu CPD-RDTL ne’ebe hatais farda kumpletu, ne’ebe sei lori trauma ba povu iha distritu hodi povu moris la hakmatek. 

 Entertantu, foin lalais ne’e Komisaun B bolu Sekretariu Estadu Seguransa, Francisco Guterres ho Sekretariu Estadu Defeza (SED), Julio Thomas Pinto ba iha PN no husu sira nia responsablidade hodi hola medidas ba movimentu sira ne’e, maibe, SES ho SED informa katak, sira atua labele, mas sei iha meus atu hala’o operasaun konjunta atu fo seguransa ba povu hodi koloka membru PNTL no F-FDTL iha Distritu 13. 
.

Sem comentários:

Publicar um comentário

Nota: só um membro deste blogue pode publicar um comentário.