quinta-feira, 22 de novembro de 2012

Xefe Estadu Husu ba grupu CPD RDTL labele halo provokasaun

 .

Presidência da República de Timor Leste  - Facebook

Dili, Timor Leste, 21 November 2012

FOR IMMEDIATE RELEASE

Prezidente Repúblika Taur Matan Ruak Kuarta-feira dadersan ne’e desloka ba sub-distritu Fatuberliu, distritu Manufahi hodi hasoru malu ho gupu CPD-RDTL ne’ebé oras ne’e dau-daun konsentra iha fatin ne’ebá, inklui hasoru malu mós ho komunidade Fatuberliu nian hodi husu ba partes rua ne’e atu manetin unidade nasiónal no kalma no labele provoka malu. 

Xefe Estadu dahuluk hala’o enkontru ho grupu CPD-RDTL kuaze ema nain 5000 resin ne’ebé mak Xefia hosi Antonio Aitahan Matak, iha enkontru ne’e grupu CPD-RDTL aprezenta ba Xefe Estadu katak sira nia prezensa no movimentasaun iha sub-distritu refere laos atu halo tauk komunidade no okupa rai komunidade nian maibe atu halao servisu komum agrikultura iha fatin ne’ebá tuir orientasaun sira nia grupu nia hirarkia. 

Iha sorumutu ne’e Xefe Estadu husu ba grupu CPD-RDTL atu respeita atutoridades lokal no tenke fó koñesementu ba autoridade lokal kona-ba sira nia prezensa iha fatin ne’ebá, atu nune’e komunidade labele pániku ho CPD-RDTL nia prezensa. 

Iha biban ne’ebá Xefe Estadu mós hameno ba grupu CPD atu labele kria problema no provokasaun ho komunidade sira iha fatin refere. 

Entretantu hafoin remata dialógu ho grupu CPD, Xefe Estadu mós hala’o enkontru ketak ho komunidade sub-distritu Fatuberliu nian, iha dialógu ne’e komunidade sira lamenta ba Xefe Estadu kona-ba prezensa CPD iha sira nia fatin ho ilegalmente no uja komunidade nia rai la iha koñesementu ba lider komunitaria no autoridade sub-distritu no distritu ne’ebá nian. Komunidade mós ejiji ba Xefe Estadu katak, se grupu CPD-RDTL mak la sai hosi sira nia fatin, mak sira sei ba refujia iha fatin seguru tamba trauma ho movimentu CPD nian. 

Hatan ba kestaun ne’e Xefe Estadu fó garante ba komunidade katak PNTL ho F-FDTL sei fó seguransa iha area refere hodi observa aktividade grupu CPD nian, tamba ne’e Xefe Estadu husu ba komunidade atu lalika paniku no tauk ho prezensa grupu CPD nian. 

Entretantu hosi parte Governu mos sei haruka ekipa ida ne’ebé mak xefia hosi Ministru Estatal atu halo negosiasaun ho grupu CPD ne’eb’e oras ne’e dau-daun konsentra iha sub-disttritu Fatuberliu. Hola parte iha delegasaun Xefe Estadu nian ne’e; mak hanesan Vice Primeiru Ministru, Sekretariu Estadu SEDA, Tomas Cabral, Administardor sub-distritu Fatuberliu ho Komandante PNTL Esquadra Fatuberliu nian. 

Atu hetan informasaun liu tan Kontatu: 

Roberto de Sousa ( OIC) 
Palacio Presidenti, Aitarak Laran Dili, Timor Leste 
Telemovel : +670 7800 1011 
E-mail : assessorict@presidencia.tl

Nota do blogue:  GRANDE PRESIDENTE!
,

Sem comentários:

Publicar um comentário

Nota: só um membro deste blogue pode publicar um comentário.