quarta-feira, 19 de dezembro de 2012

“FRETILIN Eziji PJR Investiga Ministra Emilia”

.
Foto, Tempo Semanal
Jornal Independente - Kuarta-feira, 19 Dezembru 2012 

Bancada FRETILIN Eziji Prokuradoria Jeral Republika atu halo investigasaun ba Ministra Financas Emilia Pires ne’ebe deskonfia entrega Projeitu ba nia kaben Warren Macleod liu husi kompania Macs’s Metalcraft. 

Deputadu Francisco Branco husi Bancada FRETILIN kestiaona kazu ne’e relasiona ho publikasaun jornal Tempo Semanal iha 27 Fulan-Novembru 2012 hatete, Ministra Fiancas Emilia Pires hetan alegasaun aprova orsamentu adisional ho montante milaun U$2 resin dollar Amerikanu ho sistema single source ba kompania Macs’s Metalcraft ne’ebe lidera husi Ministra Financas nia kaben Warren Macleod hodi sosa kama ba hospital sentral ho karakter urjensia iha fevereiru 2012 liu ba. 

 “Ironi liu mak Direktora Hospital Nasional Guido Valadares deskonese ekipamentus sira ne’ebe fornese husi kompania Marc’s Metalcraft ne’ebe oras ne’e sei rai metin hela iha armagen tanba, tuir pedidu inisial husi ospital ho karakter urgensia atu sosa ekipamentu ba Unidade Hemodialise atu halo atendementu ba pasiente fase ran ne’ebe oras ne’e barak hein hetan atendementu, hanesan ekipamentu hemodialise unidade rua, kama unidade rua no material seluk, relasiona ho servisu hemodialise maibe ikus mai nakfila a’an ba lista material ne’ebe laos pedidu husi ospital ne’e rasik, ne’ebe fornese husi kompania Marc’s Metalcraft ne’ebe nia director Sr. Warren Macleod Ministra Financas Emilia Pires nia kaben,” dehan Branco. 

Tuir Branco hateten, Diretor Hospital Guido valadares deskonese ekipamentu sira ne’ebe fornese husi kompania Marc’e Metalcraft no to’o oras ne’e sei kontinua rai iha armazen hospital nian. 

“Bancada FRETILIN hakarak husu ba Ministeriu Publiku atu hahu investiga Ministra Financas Dra. Emilia Pires, responsavel maximu ba jestaun financas estadu ne’ebe tuir alegasaun aprova orsamentu adisional hodi fo projeitu ba nia kaben hodi viola lei aprovizionamentu tanba konflitu interese,” dehan Branco iha Uma fukun PN (18/12). 

Tuir Branco, husi hahalok Ministra Emilia Pires, Bancada FRETILIN iha duvida no lakon ona konfiansa, tanba ne’e iha kontestu prinsipius sira ne’ebe difini iha United Nations Covention Against Coruption UNCAC, ami kestiaona konfiansa ba figura ida ne’e.
.

Sem comentários:

Publicar um comentário

Nota: só um membro deste blogue pode publicar um comentário.