quarta-feira, 19 de dezembro de 2012

“PN Aprova Rezolusaun Ba NKS”

.

Jornal Timor Post - Kuarta-feira, 19 Dezembru 2012 

Parlamentu Nasional (PN), Tersa (18/12), aprova ona projeitu rezolusaun numeru 2/III atu fo omenazen ba Saudozo Nino Konis Santana (NKS) ne’ebe nia estatutu sai hanesan lider nasional. 

Rezolusaun ba Xefi Konsellu Politiku Nasional Militar FALINTIL no Sekretariu Komisaun Diretiva FRETILIN ne’e passa ho votus 49 no kontra zero. 

Tuir programa no konvite ne’ebe Parlamentu Nasional simu husi Prezidenti Republika katak, Tersa (18/12) restus mortais saudozo NKS familia sira intrega ona ba estadu iha Tutuala, Distritu Lautem, no kuarta ohin (19/12), sei lori sai restus mortais Saudozo husi Tutuala ba Parlamentu Nasional iha tuku 2 Lokoraik hodi hala’o serimonia omenazen hikus. 

“Programa Parlamentu Nasional, ohin tuku 2 lokraik iha sesaun solene atu fo omenazen ba saudozo NKS,” dehan Prezidenti Parlamentu Nasional, Vicente Guterres iha Plenaria PN. Tempu hanesan, Xefi Bancada FRETILIN Aniceto Guterres hateten, Saudozo Nino Konis Santana nu’udar komandante en-xefi aubstitui Komandante Xanana Gusmao wainhira xanana hetan kapturasaun iha tinan 1992, entaun, ninia pozisaun komandante en-xefi no estatutu hanesan lider nasional. 

Nune’e mos, Xefi Bancada CNRT Natalino do santos katak, Parlamentu tenki halo duni rezolusaun hodi hatuur loloos saudozo NKS nia estatutu hanesan lider nasional para rai hela ba istoria jerasaun foun atu konese loloos autor ne’ebe kaer prosesu ba independensia. 

“Rezolusaun ba NKS ami Bancada 4 asina ona hodi hatur loloos heroi sira nia estatutu, tanba ida ne’e hanesan baze fundamental ba istoria Timor nian,” Natalino dehan.
.

Sem comentários:

Publicar um comentário

Nota: só um membro deste blogue pode publicar um comentário.