sexta-feira, 28 de dezembro de 2012

PNTL Kaptura Eis MJ “Advogadu Lucia Konsidera Tribunal Timor Iha Presegisaun Politika”

.

Notisia Husi TVTL - Kinta-Kalan, 27 Dezembru 2012 

Polisia Nasional Timor Leste (PNTL) kaptura eis Ministra Justica (MJ) Lucia Lobato iha Bidau, hafoin hetan mandatu detensaun husi Tribunal Dili. Advogadu arguida Lucia Lobato konsidera, mandatu detensaun ne’e nakonu ho tendensia politika. 

Tribunal Distrital de Dili hasai mandatu detensaun ba arguida eis Ministra Justica Lucia Lobato iha loron 22 fulan Dezembru tinan ida ne’e, maibe mandatu detensaun ne’e foin ezekuta husi Polisia Nasional Timor Leste iha kinta feira ne’e, hodi halo primeira interogatoriu. 

Arguida Lucia Lobato to’o iha Tribunal Distrital Dili, kuaze tuku hat lorokraik hodi hala’o rejistu, antes atu halo premeiru interogatoriu iha Sexta feira semana ne’e. 

 “Ba iha detensaun ninian, iha 22 liu ba i ohin sira efetua no ohin halo aplika mandadu de detensaun ba iha arguido ho rajaun tamba dehan katak, Tribunal fo julga, hau hakarak hateten ba iha hotu katak, durante ne’e hau nia kliente husi inisiu kedas kolabora iha prosesu ida ne’e to’o agora i ami sei halo rekursu extraordinariu ba iha prosesu ida ne’e no nia sempre kolabota ho justica, laiha rajaun ida para atu halo detein, maibe tamba juis mak iha autoridade, iha poder judisiariu para atu halo dekreta kona ba poder tetensaun, e sira iha direitu ba ida ne’e. 

Maibe ami hakarak hateten katak, podia mandatu detensaun ida ne’e la presiza atu halo, tamba laiha peridu de foga, laiha indikasaun ida katak, Lucia Lobato atu halai husi teritoriu Timor Leste ba iha nasaun sira seluk,” dehan Advogado Sergio. 

Advogado Lucia Lobato konsidera mos mandatu detensaun ne’e nakonu ho tendensia Politika. 

“Rekurus extra-ordinariu hatama iha tuku hat i rejista hela iha Tribunal de Dili, Polisia sira hala’o hela orden detensaun ba problema ne’ebe hanesan, ami halo rekursu ba desizaun ne’ebe tribunal halo, ne’e inkonstitusional, iha inregularidade tamba ida ne’e, Tribunal dentru de prazu nia sei fo lai ba Ministeriu Publiku estuda depois nia sei halo kontra rekursu ne’ebe mak ami fo, bai-bain tuir regras ne’e, primeiru interogatoriu prosesu iha Tribunal Dili depois sa’e ba Tribunal Rekursu depois desidi maka, desizaun ne’eba mak sei manda mai, laiha tan desizaun neebe mak hanesan atu superior liu fali Tribunal rekursu halo hela, desizaun ne’ebe Tribunal halo ne’e, inkonstitusional, inregularidade tamba ida ne’e prosesu neebe mak hahu tiha ona, desizaun ne’ebe feitu tiha ona iha Tribunal Rekursu ne’e la vale, la tuir konstituisaun, laiha folin, tamba ida ne’e sei iha imunidade, se ida ne’e mak akontese, ita bele dehan Tribunal iha Timor ne’e ita halo presegisaun Politika,” dehan Pedro Aparicio. 

Oras ne’e dadaun arguida Lucia Lobato detein hela iha sela polisia Distritu Dili hodi hein prosesu Primeiru interogatoriu iha sexta feira semana ne’e. Antes ne’e, tribunal rekurus reforsa desizaun Tribunal Primeiru instansia hodi hamonu sentensa tinan 5 kadeia ba arguida Lucia Lobato.
.

Sem comentários:

Publicar um comentário

Nota: só um membro deste blogue pode publicar um comentário.