quarta-feira, 19 de dezembro de 2012

“Xanana Reprejenta Familia Entrega Ruin NKS Ba Governu TL”

.

Jornal Timor Post - Kuarta-feira, 19 Dezembru 2012 

Eis komandante FALINTIL, Kay Rala Xanana Gusmao reprezenta familia husi Tutuala no familia rejiaun IV hodi entrega ruin Saudozu Nino Konis Santana (NKS) ninian ba iha Governu Timor Leste. 

Xanana Gusmao reprejenta husi Vice Primeiru Ministru Fernando ‘La-Sama’ de Araujo hodi intrega ruin Saudozu Nino Konis Santana nian ba Governu iha Tersa (18/12) atu lori hela ba iha Jardim Heroi Metinaro-Dili. Iha serimonia ne’ebe hala’o durante oras hira nia laran ne’e, eis komandante FALINTIL Xanana Gusmao tur hamutuk ho familia Saudozu NKS hanesan inan husi saudozu nian rasik no la tur hamutuk ho membru governu, deputadu, Xefi Estadu Maior jeneral Lere Anan Timur no reprejetante sira seluk ne’ebe partisipa. 

Poko-Tanan nu’udar inan husi Saudozu NKS hateten, nia oan oferse ona nia vida tomak hodi liberta povu husi kolonializmu ba iha Independensia, maibe nia husu ba estadu atu rekoinese luta ne’ebe nia oan halo durante nia moris to’o hakotu ninia is. 

 Entertantu, Eis Sub-Xefi Estadu ba rejiaun Ponta Leste, atual Xefi Estadu Maior Jeneral F-FDTL, Lere Anan Timur hateten, loron ne’ebe ohin (horsehik) importante ba povu Timor Leste tomak no laos ba familia Saudozu ninian deit. 

Nia dehan, familia no povu tomak ne’ebe halibur hamutuk hodi halo reflesaun ba saudozu NKS durante nia moris halo saida no to’o ninia iis kotu iha Suku Mertutu, Sub Distritu Ermera, Distritu Ermera iha 11 Marsu 1998. 

 “Uluk familia hasoru hau ne’e, hau dehan familia tenki halo buat kiik, maibe estadu mak tenki halo buat boot, se familia hakarak halo estadu ninian no familia ninia, entaun estadu atu halo saida,” dehan Lere. 

Nia dehan, saudozu NKS durante moris hamutuk ho eis komandante Xanana Gusmao hodi halo kontinuasaun ba iha hanoin ida maka Unidade Nasional tanba konseitu Unidade Nasional maka halo Timor-Leste hetan ninia independensia. 
.

Sem comentários:

Publicar um comentário

Nota: só um membro deste blogue pode publicar um comentário.