sexta-feira, 25 de janeiro de 2013

“CNT Dispede Ona Raul Lemos”

,
Raul Lemos
Jornal Nacional Diario - Sesta-feira, 25 Janeiru 2013 

Concorsio Nacional Timorense (CNT) despede ona kompania ATRAMOR Sucesso ne’ebe lidera husi Raul Lemos, tanba konsidera Raul Lemos la dun kooperativu ona iha CNT nia laran. 

Desizaun ne’e deklara unanimamente husi maioria membru CNT atraves Asembleia Geral Extra Ordinario CNT nian ne’ebe hala’o iha loron 10 fulan janeiru, tinan ne’e. 

Vice Prezidenti CNT, Agusto Gomes ho Nilton do Santos Gusmao, informa ba Jornalista sira iha Hotel Audian, Dili, Kinta (14/1) katak, konselhu Prezidenti no membru CNT tomak halo ona aklamasaun hodi dispede ATRAMOR tanba la dun kooperativu ona iha CNT, inklui abandona projeitu Ponte Aitarak Laran ne’ebe governu fo fiar ba CNT atu ejekuta. 

Liu husi konferensia imprensa ne’e, Agustinho Gomes dismente afirmasaun Project Manajer ATRAMOR nian, Ir, Jhonny Klau, ne’ebe hateten ATRAMOR la abandona projeitu konstrusaun Ponte Aitarak laran, Dili. 

Agustinho Gomes realsa katak, ATRAMOR abandona duni projeitu ponte Aitarak laran, tanba ne’e mak CNT tenke hola responsablidade fali atu bele salva reputasaun CNT nian iha publiku. “Komesa ohin ba oin, ATRAMOR la’os ona membru CNT, desizaun ne’e ami foti hodi bele salva CNT,” afirma Agustinho Gomes. 

Nia mos hatutan, konferensia ne’e mos hetan autorizasaun legal husi Prezidenti CNT, Jorge Serano, ne’ebe oras ne’e hala’o hela aktividade servisu iha rai liur. Hafoin dispede tiha ATRAMOR, CNT mos hola kedas desizaun hodi apara ona atividade ATRAMOR nian iha projeitu Ponte Aitarak Laran hodi atribui fali ba kompania G$S neebe lidera rasik husi Nilton Gusmao ho kompania Suai Indah ne’ebe Americo Ferozota mak lidera. 

Agustinho hatutan, informasaun dispede ATRAMOR husi CNT informalmente Raul Lemos hatene ona, wainhira Raul Lemos to’o ona iha Timor Leste, maka CNT intrega hikas akta ba Raul lemos ne’ebe legaliza tiha ona iha Notariado. 

Kona ba sosiu ne’ebe Raul Lemos hatama ba iha CNT, Agustinho hateten, wainhira raul Lemos to’o ona iha Timor, maka CNT bele intrega hour ATRAMOR nia sasan sira ne’ebe sei iha CNT nia laran. Konfernsia imprensa ne’ebe akompania mos husi Diretor Kompania Montana Diak, Lay Fu Sen, Diretor Suai Indah, Americo Ferozota, no reprezetante kompania HIDAYAT ne’e, Agustinho Gomes nuudar diretor kompania TINOLINA, sublinha liu tan katak, durante ne’e Raul Lemos nunka ona iha kooperasaun ho CNT. 

Realidade mak iha asembelia geral iha fulan setembru tinan kotuk ho asembleia extra ordinariu, foin lalais ne’e, Raul la marka prezensa. 

Iha fatin hanesan, Nilton Gusmao nuudar mos Vise Prezidenti CNT reforsa tan katak, koalia kona parseira signifika presiza koopera malu, maibe ho preokupasaun Raul Lemos nian ne’ebe laiha informasaun, maka konsellu Prezidensial tenke foti medidas atu bele asegura CNT. 

Ho desizaun ne’ebe CNT foti ona hasoru ATRAMOR, signifika CNT nia membru hela deit ona nain 7, kompostu husi kompania, MARABIA, TINOLINA, G&S Construction, Jonize, Montana Diak, Ho HIDAYAT.
.

Sem comentários:

Publicar um comentário

Nota: só um membro deste blogue pode publicar um comentário.