terça-feira, 29 de janeiro de 2013

“Teixeira no Meneses Sai Konsellu Fundu Petroliferu”

.

Jornal Timor Post - Tersa-Feira, 29 Janeiru 2013 

Parlamentu Nasional hili eis deputadu Jose Teixeira husi Partidu FRETILIN ho Rui Meneses husi Partidu Demokratiku sai membru Konsellu konsultivu ba fundu Petroliferu ho votus a favor 58, kontra 2, abstensaun 3. 

“Ami sei halo konfirmasaun ba eis Prezidenti da Republika, eis Primeiru Ministru, eis Ministra finansa, eis Ministru Petroleu ne’ebe autikamente sai membru Konsellu Konsultivu fundu Petroliferu,” Segundu Vice Prezidenti PN Aderito Hugo da Costa hateten ba Jornalista sira iha Parlamentu Nasional (PN), segunda (28/1) hafoin votasaun. 

Nia esplika, membru konsellu konsultivu ne’e hanesan membru automatikamente, bainhira hakarak delega tenki konfirma mai PN para haree eis titular sira seluk atu reprejenta, tuir lei fundu petroliferu, eis titular sira iha diretu deretamente sai membru konsellu konsultivu fundu petroliferu. 

Hugo informa, mandatu dahuluk ba membru konsellu konsultiva remata ona iha Novembru 2012, maibe segundu lejislatura la konsege halo ajenda tanba ne’e maka muda to’o membru foun subtitui, Aderito hatutan, konsellu konsultivu fundu petroliferu iha PN nia tutela. 

Aderito dehan tan, konselu konsultivu nia na’ar mak fo konseleru ba lei fundu petroleu, tanba lei ne’e defini konsellu atu fo konsellu ba PN kada tinan, relasaun ho levantamentu fundu petroleum ba despeza estadu liu husi proposta orsamentu. 

Entertantu deputadu husi bancada FRETILIN, Inacio Moreira hateten, sente orgulhu tanba eis deputadu Jose Teixeira hetan fiar husi Parlamentu Nasional sai membru konsellu konsultivu fundu petroliferu. 

“Espera katak, sira sei ezerse sira nia funsaun hanesan konsellu konsultivu ba fundu petroliferu ho diak, atu dezenvolve nasaun ne’e iha futuru mai,” dehan Inacio.
.

Sem comentários:

Publicar um comentário

Nota: só um membro deste blogue pode publicar um comentário.