sexta-feira, 22 de fevereiro de 2013

“Emilia Helik”

.

Jornal Timor Post - Sesta-feira, 22 Fevereiru 2013 

Ministra Finansas Emilia Pires kontinua helik an husi Jornalista sira nian kobertura hafoin media nasional sira halo publikasaun kona ba nia kazu aprova osan ba nia laen kaben hodi sosa kama ba Ospital Nasional Guido valadares (ONHGV). 

Iha loron 06/2 iha plenaria uma fukun Parlamentu Nasional (PN) wainhira debate namanas Orsamentu jeral Estadu (OJE) 2013, Emilia Pires, foti oportunidade ho lian maka’as iha Primeiru Ministru xanana Gumsao nia sorin hodi ataka media sir anoa hateten media manipulador, laiha kapasidade no seluseluk tan. 

Ho atake ne’e, iha loron tuir mai Asosiasaun media sira lidera husi Timor Leste Press Club (TLPC), hala’o konferensia imprensa hodi kontinua publika faktus kona ba kazu Ministra Emilia nian, no husu Ministra Emilia atu loke an ba media hodi halo balansu publikasaun media sira nian ba nia kazu ne’e. 

No iha loron 21/2 Forum Editor Media nasional sira liu husi konferensia imprensa amesa izola kobertura ba Ministra Emilia , wainhira Ministra Emilia la dada lia fuan hirak ne’ebe Ministra Emilia hakilar iha uma fuku PN, tanba tuir Forum editor sira, liafuan Ministra Emilia iha debate OJE ne’e ofende profisaun Jornalista sira. 

Hetok Ministra Emilia helik metin liu tan husi media sira, situasuan ne’e kontinua mosu iha loron 21/2, wainhira Ministra Emilia rasik maka organiza ba konferensia imprensa kona-ba konferensia internasional nasaun frazil sira iha edifisiu Ministeriu Financas, maibe Ministra Financas rasik to’o hikus la marka prezensa. 

Wainhira hahu konferensia imprensa, minutu rua nolu antes observasaun jornalista Timor Post haktuir Ministra Emilia nian naran mos tau ona iha meza leten konferensia nian, maibe ikus mai funsionariu sira ba hasai tiha. Antes ne’e mos tuir ajenda ba konferensia imprensa ne’e, hahu iha tuku 11:00 maibe derepenti deit muda ba tuku 12:00, no ikus mai marka prezensa iha konferensia imprensa ne’e, Vice Primeiru Ministru Fernando La Sama, Ministru Turizmu, Vise Ministru Financas, Vise Ministru negosiu Estranjeiru, no Sekretariu Estadu Komunikasaun Sosial. Iha konferensia imprensa ne’e, La Sama hateten, konferensia internasional ba nasaun frazil sira ne’ebe sei hala’o iha Dili, ne’e laos ema ida nia mesak ka Ministeriu Finansas maka organiza, maibe ne’e governu Timor Leste maka organiza. 

“Konferensia ne’e ita nia Primeiru Minisru rasik maka hasai konvite ba bainaka sira hotu, tanba ne’e hau husu ba povu tomak atu simu ita nia bainaka sira ho didiak hodi hametin paz no estabilidade, hakamatek no hatudu ita nia ospitalidade nuudar Timor oan,” La sama sublinha. 

Relasiona ho problema entre Ministra Emilia Pires ho Media sira, Reprezetante povu iha uma fukun Parlamentu Nasional fo sira nia preokupasaun no tau importansia maka’as ba informasaun ba publiku. 

Tuir deputadu sira, wainhira media halo ona boikota ba atividade membru governu ida nian maka publiku susar ona atu akompania prosesu dezenvolvimentu nasaun nian.
.

Sem comentários:

Publicar um comentário

Nota: só um membro deste blogue pode publicar um comentário.