quarta-feira, 20 de fevereiro de 2013

“HAK Husu Investiga Hotu Kazu Korrupsaun”

.

Jornal Independente - Kuarta-feira, 20 Fevereiru 2013

Assosiasaun HAK husu ba Komisaun Anti Korupsaun (KAK) no Ministeriu Publiku (MP) hodi labele halo diskriminasaun ba kazu korupsaun sira seluk ne’ebe tama ona iha prosesu investigasaun. 

Diretor Ezekutivu asosiasaun HAK Rogerio Viegas Vicente dehan, kona ba kazu eis administrador Distritu Dili, Rubern Carvalho Braz no Diretora jeral gabinete Primeiru Ministru, Flavia Sereno ne’e kompetensia ba Komisaun Anti Korupsaun (KAK) no Ministeriu Publiku hodi hala’o prosesu investigasaun. 

“Maibe, hau hanoin katak, iha esforsu ne’ebe sei la’o hela husi KAK no Ministeriu Publiku kona ba kazu korupsaun hirak ne’e, ami espera katak, kazu ne’e iha indikasaun korupsaun, mal-administrasun, nepotizmu ne’ebe komete husi instituisaun estadu, ami fiar katak, KAK no Ministeriu publiku sei la halo diskriminasaun ba kazu hirak ne’e,” hateten Rogerio iha konferensia imprensa (19/2). 

Rogerio dehan, kontinua fo perioridade ba kazu alegasaun korupsaun, nepotizmu no abuzu de poder nuudar passu ida hodi hatudu ba publiku katak, lei ne’e bele duni ba ema hotu atu nune’e ema balun ne’ebe hetan ona sentensa no hala’o ona nia kumpri iha prijaun labele sente katak, lei ne’e vale de’it ba ema ki’ik sira. 

“Karik lei ne’e labalansu ba ema hotu, ida ne’e hatudu imazen ka presedente ladiak ba futuru atu oinsa bele hametin sistema judicial iha rai laran,” nia hateten. 

Ministeriu Publiku halo akuzasaun maka’as hasoru arguida Flavio Sereno tnab deskonfia envolve iha pratika krime falsifikasaun dokumentus, krime pekulatu no krime abuzu poder tuir lei kodigu penal Timor-Leste. Iha parte seluk, Ministeriu Publiku mos akuza eis administrador distritu Dili, Arguidu Ruben de Carvalho Braz no Helio Francisco da Costa nuudar funsionariu Diretor Nasional Diresaun Nasional Dezenvolvimentu Lokal no Ordenamentu Teritoriu (DNDLOT) kona ba ezekusaun programa PDD. 

Arguidu Ruben Braz antes ne’e mos hetan ona akuzasaun no julga tiha ona iha tribunal Dili kona ba krime falsifikasaun hodi hetan ona kondenasaun husi desijaun Tribunal Primeira instansia ho pena prizaun efetivu tinan 3 fulan 6 nomos indeminizasaun USD 21,000.00. prosesu ne’e rejistu iha Tribunal Dili ho nia numeru prosesu, 364/C.Ord/TDD/2009. Oras ne’e sei iha faze rekursu. 
.

Sem comentários:

Publicar um comentário

Nota: só um membro deste blogue pode publicar um comentário.