terça-feira, 19 de fevereiro de 2013

INTERVENSAN HUSI DR. MARI ALKATIRI, DEPUTADU NO SEKRETÁRIU JERÁL FRETILIN NIAN, HODI BANKADA FRETILIN NIA NARAN, HO DEKLARASAUN VOTU BA LEI OJE TINAN 2013 NIAN

.


Dili, 18 Fevereiru 2013

Na’i Prezidenti Parlamentu Nasionál!
Na’i Primeiru-Ministru!
Ilustre Deputadu no Membru Governu sira!
Na’i-ulun sira!

Ita hahú ohin, ho aprovasaun OJE 2013 idane’e, moris foun konverjénsia polítika nian hodi hametin liu tan Nasaun no Estadu de Direitu Demokrátiku iha rai Timor-Leste. Tuir teoria polítika ita bele dehan katak ho OJE idane’e, ita estabelese ona entendimentu pontuál iha insidénsia parlamentár. Depende ba ita atu kaer ba entendimentu pontuál idane’e, no halo nia fila-án ba entendimentu ho natureza estratéjika hodi, dékada ne’ebé foin dadaun hahú, bele sai  dékada ba dame, estabilidade no ba dezenvolvimentu inkluzivu no sustentável.

Hamutuk ita koko paradigma tuan sira no ita buka harii foun seluk. Hamutuk ita sei buka kontribui lisuk atu mundu globál ne’e bele mós aprende atu respeita diferensas no atu konsidera sira nu’udar rikusoin golbál hodi bele evita extremizmus mosu husi ne’ebé de’it, no oinsa’a de’it.

Tinan sanulu hafoin hadau-hikas ita-nia ukunrasikán, ita konklui katak, tanba ita hakur liu konjuntura no kontextu oioin, ohin, ita bele fiar-án makaas atu bele lao ba oin, lao ba sínteze ida no buka hetan solusaun hotuhotu. Laíha dúvida katak buka atu hetan solusaun iha modelu sira ne’ebé esgotadu ona nia-laran, sei lori de’it ita ba susesu temporáriu ne’ebé, ho idane’e, sei la garante buat seluk ruma tan, sei lori ita fila-fali nafatin ba insusesu.  Ho neon momoos ba idane’e, ita hakat to’o iha entendimentu pontuál iha insidénsia parlamentár idane’e.

Ho konverjénsia idane’e ita hamoris dinámika foun hodi harii demokrasia, dalan foun ida ba reforsu sidadania – demokrasia ida partisipativa, no sidadania ida responsável. FRETILIN nia bankada partisipa ativu tebtebes iha reestruturasaun OJE 2013 nian, no ho idane’e, asumi mos responsabilidade atu hotuhotu vota tomak a favór ba OJE. Konsensu garantidu duni. 

Foin segunda vez, karik ha’u la sala, maka PN aprova proposta Lei ida ho unanimidade. Mosu ona dala ida ho Lei nr. 9/2005 loron 3 fulan Agostu, Lei Fundu Petrolíferu no, ohin, ho Lei OJE 20313.

Laós foin maka akontese idane’e iha ita-nia PN, iha ita-nia demokrasia nurakoan idane’e. Fundu Petrolíferu sei reprezenta nafatin bé-matan prinispál ba finansiamentu ita-nia OJE. Lei ne’ebé mak harii fundu ne’e adopta ho unanimidade ho razaun lójika tanba konsidera nu’udar instrumentu ida hodi reforsa ita-nia soberania.

Tanba ne’e: Fundu Soberanu.

Ami rekoñese duni, katak to’o ohinloron, ita sempre iha hanoin ida katak Orsamentu sira instrumentu exkluzivu Governu sira nian maski hanaran Orsamentu Jerál Estadu nian. Nunka distingi momoos saída mak Governu, nu’udar koletivu ida responsável atu halo ezekusaun programa ida, no saída mak governasaun, ka diak-liu, governasaun diak, ne’bé laós Governu sira nia responsabilidade mesak, maibé responsabilidade mós Sosiedade tomak nian, liu-liu Órgaun soberania sira no instrumentu kompetente hotuhotu ba ezekusaun, ba fiskalizasaun no ba kontrolu ezekusaun orsamentál.

Ho ami-nia votu a favór, ami hakarak tatoli lia-menon ida, eh, atu afirma katak OJE pertense ba ema hotuhotu. Nu’udar Kbit ida iha Bloku, ne’ebé kompoen Governu, nia liur, ami rekuza atu simu “status quo” ba demokrasia ida ba eleisaun de’it. Demokrasia sei iha de’it bainhira modelu ne’ebé mak ita adopta sei lori ita ba hetan ita-nia objetivus ne’ebé, tau iha oin-liu, kombate hasoru kiak. No, hafoin tinan sanulu, ita lalika iha tan dúvidas kona-bá nesesidade atu ita lao hamutuk.

Maibé FRETILIN lakohi mehi de’it. Sei halo buat hotuhotu hodi povu tomak nia mehi sai duni realidade, mehi ne’ebé iha tempu uluk haburas ita-nia kbit no kriatividade atu bele responde ba dezafiu sira no halo ita bele hakur-liu riskus oioin. 

Na’i Prezidente!
Na’i Primeiru-Ministru!
Ilustre Deputadu no Membru Governu sira!

Hafoin vota a favór ba OJE 2013, ita hotu sente nu’udar na’in ba nia. Ne’eduni, obrigasaun boot liu tan ba ami atu garante ezekusaun diak, ezekusaun ida efikáz no efisiente, hatuur iha ezijénsia ba rezultadus, maibé sei la haluha prinsípiu fundamentál jestaun diak ba Finansas Públikas. Kestaun ba kualidade prestasaun servisus no ligasaun entre kustus ho benefísius sei kontinua nafatin hanesan baze hodi hatuur ami-nia intervensaun ba.

Nune’e, FRETILIN sei haforti ninia fiskalizasaun – prévia no a posteriori - ba ezekusaun OJE 2013. Ami hein de’it katak Governu tomak hatene kompreende dinámika demokrátika inovadora idane’e no sei koopera hodi bele to’o iha susesu. Ami hein mós atu PN hola inisiativa hodi adopta lejislasaun loloos no adekuadus hodi reforsa Fiskalizasaun no kontrolu ezekusaun OJE 2013.

HUSI AMI, AMI SEI TUUR NAFATIN IHA GOVERNU NIA LIUR. MAIBÉ AMI SEI HAFORTI LIU TAN AMI-NIA PAPÉL FISKALIZADÓR HODI BELE GARANTE ATU ITA-NIA POVU NIA HAKARAK SEI TO’O DUNI MAI.
IHA TEMPU OPORTUNU ITA SEI HALO BALANSU.

Ha’u-nia liafuan mak ne’e de’it,

Obrigadu barak.
.

Sem comentários:

Publicar um comentário

Nota: só um membro deste blogue pode publicar um comentário.