terça-feira, 19 de fevereiro de 2013

KAK Investiga Ona Kazu Emilia Pires

.
Foto, Tempo Semanal

Jornal Independente - Husi : Raimundos Oki - 19-02-2012

DILI : Komisaun Anti-Korrupsaun (KAK) hahú investiga ona kazu alegasaun Korrupsaun Kolusaun no Nepotismu (KKN) hasoru Ministra Finanas Emilia Pires.

Segunda horsehik, KAK hahú ona primeiru investigasaun ba eis Diretora Jerál Hospitál Nasionál Guido Valadares Odete Viegas kona ba prosésu projétu sosa kama no makina Hemodelisa ba hospitál nasionál ne’ebé deskonfia mosu iregulariedade barak.

Ministra Emilia Pires deskonfia aprova orsamentu ba nia kaben Warren Macleod nu’udar Direktor kompañia Mac’s Metal Craft, ne’ebé uza osan fundus kontijénsia hamutuk $895, 140.00 dolar Amerika hodi sosa ekipamentus Hospitál Nasionál Guido Valadares nian, iha tinan 2012.

Tanba ne’e, KAK bolu eis diretora jerál ne’e (iha altura neba nia diretora jerál HNGV) hodi hala’o investigasaun durante horas haat (4) nia laran, hahú iha horas 9:30 dadersan to’o iha horas 12:30.

Eis Diretora Jerál HNGV, Odete Viegas esplika ba jornalistas katak, nia prezensa iha KAK hodi responde KAK nia prekupasaun atu hatene situasaun no kondisaun real ne’ebé durante ne’e hospitál nasionál enfrenta.

“Nu’udar diretora (iha momentu neba), ha’u sei esplika tuir de’it lalaok hospital nian kona ba atividade hirak ne’e mak ohin ha’u mai esplika ba senhor ne’ebé mak sai nu’udar investigadór ba ha’u nu’udar eis diretora jeral hospital nasional,”hateten Odete ba jornalistas hafoin remata prosesu investigasaun iha edifisiu KAK, Farol, Dili Segunda horseik.

Pergunta hamutuk lolon haat ne’ebé KAK husu ba eis diretora HNGV. KAK husu kona papel nu’udar diretora jerál hospital nasionál, planu annual ba orsamentu jerál estadu kada tinan.

“Fo mós ha’u nia sasin hanesan responsabilidade mazimu ba iha hospitál nasionál ba iha kompras ne’ebé mak relasiona ho kamas ba hospitál,”dehan Odete.

Odete rekoñese iha tempu ne’eba nia halo duni proposta emerjénsia ida ba Ministériu Saude hodi sosa kama rua (2) no makina Hemodelisa rua (2).

“Tuir proposta ne’ebé mak hato’o mak kama rua no makina rua, ida ne’e mak ohin ha’u hato’o ba investigadór KAK,”nia hateten.

Maibé dehan nia, wainhira kamas ne’e to’o Dili nia parte sei passa hela tempu ferias durante fulan ida. Kamas ne’ebé to’o Dili hamutuk 88. Oras ne’e HNGV uza tiha ona kamas 50 no hela 38. 

“Ha’u nia prezensa iha KAK ne’e hanesan testamuña tanba, nu’udar dirijente mazimu ba hospitál nasionál iha tempu ne’eba. Ha’u mós involve iha asinatura ba dokumentu proposta atu sosa kama rua no makina rua. Ha’u nia assinatura mak ba dokumentu rua ne’e de’it,” hateten Odete.
,

Sem comentários:

Publicar um comentário

Nota: só um membro deste blogue pode publicar um comentário.