quarta-feira, 27 de fevereiro de 2013

La Sama Dehan Mosu Mal Administrasaun Normal “FRETILIN Kontra”

.

Jornal Nacional Diario - Kuarta-feira, 27 Fevereiru 2013 

Vice Primeiru Ministru, Fernando La Sama de Araujo, konsidera mosu mal Administrasaun iha kada Ministeriu normal tanba membru Governu sira seidauk iha esperensia kaer nasaun, maibe bancada FRETILIN kontra ideias ne’e hodi dehan katak, se ema ida laiha kapasidade diak liu lalika sai Ministru. 

“Mosu mal administrasaun ne’e normal, tanba ita hotu-hotu nia avo sira la matenek, ne’ebe la hanorin ita atu kaer ukun hanesan agora ne’e, maibe korupsaun mak la diak,” deklara Vice PM Fernando La Sama de Araujo iha konferensia imprensa ne’ebe hala’o segunda (25/2) iha Palacio Governu, relasiona ho kazu Ministra Fianncas, Emilia Pires ne’ebe deskonfia fo projeitu ba nia laen kaben ne’ebe kontra ona lei aprovizionamentu. 

Ba kestaun ne’e, Deputadu Bancada FRETILIN, Joaquim dos Santos informa, deklarasaun Vice Primeiru Ministru (PM) La Sama nian ne’e la tama iha lojika ne’ebe los, basa kuandu la hatene Ministru ou ministra ida mak la hatene administrasaun lalika aseita sai Ministru. 

“Ita koalia lolos deit hanesan ne’e, Timor oan ne’ebe deit, feto ka mane, matenek ka beik katak wainhira hetan fiar husi povu atu ukun, nia tenki hatene ba nia an rasik katak, nia bele halo saida mak povu hakarak, labele simu tiha povu nia konfiansa depois husu perdaun ba inocensia no perdaun fali baa an,” kestiaona Joaquim. 

Tuir Joaquim, se Ministru ou Ministra mak laiha kapasidade iha administrative atu ukun, laos hanesan fali Vice Primeiru Ministru La sama defende fali sira ne’ebe laiha kapasidade atu ukun ne’e. 

“Hau nia hanoin katak, kuandu se senti an katak laiha kapasidade administrative atu ukun lalika aseita povo ninia mandatu atu ukun, hau lahatene nia koalia ne’e normal ka lae? 

Maibe nia mak tenke hatene nia an, hau la hatene nia koalia refere atu ba se los, katak nia la refere ba nia an,” dehan Joaquim ba JNDiario iha PN, tersa (26/2). 

Iha fatin hanesan, deputadu husi Bancada PD, Virgilio da Costa Hornai, haktuir mos katak, se hakarak asegura voa governasaun, signifika mal administrasaun laiha, entaun ba oin tenki hadia sasan sira ne’e atu labele mosu tan mal administrasaun hodi adaet ba korupsaun. 
.

Sem comentários:

Publicar um comentário

Nota: só um membro deste blogue pode publicar um comentário.