sexta-feira, 22 de fevereiro de 2013

Subar Osan U$8000 “Samuel Ameasadu Simu Suspensaun”

.

Jornal Timor Post - Sesta-feira, 22 Fevereiru 2013 

Diretor interinu Diresaun Nasional Linguistika Ministeriu Edukasaun, Samuel da Costa Alves ameasadu ho pena suspensaun tanba subar osan estadu ho valor U$8000 hodi uza ba interese privadu. 

Liu husi audensia julgamentu ne’ebe lidera husi luiz koletivu, Antonio Goncalves, Edit Palmira, Paulo Teixeira fo sai akuzasaun husi Ministeriu publiku katak, iha loron 7 Agusto 2012, arguidu foti osan estadu ne’e tau iha nia gabinete ho kofre ne’e tau iha nia pasta laran. 

No iha loron 2 Setembru 2012 Senora Natarcia da Concecicao haree osan ho total U$8000 laiha, entaun nia haruka karta ba eis Ministru Edukasaun Joao Cancio Freitas, katak osan ne’ebe atu iha kofre no rai iha diretor interinu Samuel nia fatin laiha, osan ne’e deskonfia arguidu maka foti duni tanba laiha ema ruma maka tama ba nia gabinete laran. 

Entertantu, Arguidu Samuel liu husi nia deklarasaun ba Tribunal, rekonese katak, nia mak foti duni osan estadu ho valor U$8000 hodi uza ba nia oan nia kazamentu, nune’e, osan ne’ebe lakon ne’e arguidu rekonese loos tanba antes sa’e ba diretor interinu osan refere nia kaer ona. 

Altura ne’eba nia foti osan tanba diretor mos seidauk klaru, no xave kofre nia mak kontinua kaer, entaun, iha loron 12 Agusto 2012 osan iha kofre laiha no sira nain rua funsionariu ida ho naran Esterlita hateten malu katak osan iha kofre lakon ona. 

Nune’e, arguidu hata’an ba sira katak, osan ne’ebe lakon nia mak foti, no nia hanoin atu fo fila fali osan ne’e ba kofre estadu. Hafoin arguidu deklara provas tomak ba Tribunal, jusi haree katak ho prova ne’ebe arguidu deklara la presiza rona tan testamunha tanba faktus tomak provadu iha akuzasaun. 

Nune’e, husu ba Ministeriu Publiku atu kontinua halo alegasaun, entaun liu husi alegasaun Prokurador Jose Ximenes hateten, arguida deklara faktus tomak ba Tribunal tuir prova iha Ministeriu publiku, aleinde ne’e, arguidu mos kooperasaun diak mak antes julgamentu nia intrega fali osan ne’e ba estadu. Tan ne’e, Ministeriu publiku husu ba Tribunal atu aplika pena suspensaun ba arguidu tuir artigu 295 alinea 4 kodigu penal. 

Entertantu, defensor publiku ne’ebe reprezenta husi defensor Cancio Xavier reforsa alegasaun Ministeriu publiku hodi fo pena suspensaun, atu arguidu bele aprende ho hahalok ne’ebe nia halo no evita iha futuru labele akontese tan problema hanesan. Hafoin remata alegasaun, juiz koletivu desidi suspende audensia julgamentu hodi hein leitura akordaun iha loron 8 Marsu 2013 oras tuku 02:30 Otl. 
.

Sem comentários:

Publicar um comentário

Nota: só um membro deste blogue pode publicar um comentário.