sexta-feira, 22 de março de 2013

Mari Alkatiri: “Esbosu Lei KOMSOS Trata Ita Hanesan Labarik”

.

Jornal Nacional Diario - Sesta-Feira, 22 Marsu 2013 

Eis Primeiru Ministru (PM) Dr. Mari Alkatiri konsidera esbosu lei komunikasaun social ne’ebe mak deskute iha seminariu internasional iha Hotel Timor, Dili ne’e, Trata Timor oan sira hanesan labarik ida. 

“Hau lahatene projeitu de lei ne’e mai husi ne’ebe, hau hatene katak ofisialmente mai husi Sekretariu Estadu Komunikasaun Sosial (SEKOMS) ho Portugeus ne’ebe furak, hau lahatene se mak hakerek lei ne’e i asesor ida ne’ebe mak hakerek ne’e, lahatene rona se, tanba lei ne’e trata ita hanesan ita labarik, ne’e labele,” dehan Mari Alkatiri wainhira sai panelista iha segundu dia, seminariu Internasional ho tema regulasaun ba Media hodi hari’i kultura Responsablidade, kuarta (21/3). 

Artigu balun iha esposu lei komunikasaun social ne’e, proivi (bandu-red) partidu politiku hari’i meus komunikasaun rasik, tanba ne’e Mari Alkatiri hateten, iha Konstituisaun RDTL koalia klaru katak, baze ba iha demokrasia Timor Leste mak partidu politiku, nune’e organizasaun ne’ebe sai baze ba demokrasia iha Timor Leste mak partidu politiku, nune’e organizasaun ne’ebe sai baze ba demokrasia bele iha orgaun de informasaun. 

 “Ita bele hari’i meius komunikasaun, maibe tenki defini ninia regras para limita ninia publikasaun, laos dehan labele, ne’e lalos,” Mari Alkatiri afirma.

 Mari Alkatiri mos enkoraza Jornalista sira atu labele tauk poder politiku atu hanehan liberdade da imprensa, maibe laiha liberdade se kuandu laiha responsablidade. 

“Laiha interse atu limita liberdade, maibe tenki iha responsablidade,” Mari Alkatiri akresenta. 

 Eis Primeiru Ministru no atual Sekretariu Jeral Partidu FRETILIN ne’e husu ba jornalista atu kontinua aprende, nune’e bele fo informasaun ne’ebe kualidade no ekilibriu ba komunikasaun. 

Mari Alkatiri hatutan katak, ema ida sai jornalista tanba nia brani, nia iha poder, se nia halo poder tenki halo limitasaun sira, sei iha poder labele iha abuzu de poder. 

“Kuandu ita abuzu ona ita nia poder ne’e korupsaun ida,” Mari Alkatiri afirma. 

Konaba lei denunsia kalunioza, Dr. Mari Alkatiri hateten katak, lei ne’e la’os kondena jornalista, maibe atu fo edukasaun. 

“Lei denunsiu kolunioza ne’e hau duni maka halo, ho objetivu laos atu kondena maibe atu eduka, ne’ebe media kuandu iha poder labele abuzu poder, kuandu ne’e mosu nia kontra ema seluk nia direitu, ita boot nia direitu mos lakon ona, ita boot tenki hata’an, tenki iha responsablidade, uluk iha artigu defamasaun, maibe ne’e laos ona krimi ne’ebe pronto simu buat sira ne’e,” esplika Dr. Mari Alkatiri. 

Tuir Mari Alkatiri, media ida ke livre laiha responsablidade ne’e media destroitiva la’os ona media konstrutiva, media iha responsablidade atu denunsia korupsaun, halo kontrolu social, eduka no fo informasaun, ne’e responsablidade fundamental la’os krimi, se lahalo mak komplisilidade. 
.

Sem comentários:

Publicar um comentário

Nota: só um membro deste blogue pode publicar um comentário.