quarta-feira, 20 de março de 2013

“Mari Alkatiri Prontu Apoiu Governu Negosia GS”

.

Jornal Nacional Diario - Kuarta-Feira, 20 Marsu 2013 

Eis Primeiru Ministru (PM), Dr. Mari Alkatiri hateten, nia pronto fo apoiu ba governu hodi halo negosiasaun ba kampo mina Greater Sunrise (GS). 

“Se Governu presiza hau nia opiniaun ruma, hau nia apoiu ruma ba area sunrise nian, hau seibele, hau iha kbiit para fo apoiu,” Mari Alkatiri informa ba Jornalista sira tersa (19/3) iha Aeroportu Comoro, Dili. 

Sekretariu Jeral Partidu FRETILIN ne’e mos dehan, Akordu Certain Maritime Agreement on Timor Sea (CMATS) nian ne’e laos mate iha tinan 2013 ne’e, maibe sei mate iha Fevereiru 2023. 

“Hau mos seidauk hatene katak akordu CMATS mate ona, hau rona katak, mate iha 2023 Fevereiru, depende ba pozisaun Governu Timor Leste nian ho Governu Australia nian, i hau rona katak governu rua ne’e hakarak atu akordu ne’e moris nafatin para bele kontinua ho dialogu,” dehan Mari Alaktiri. 

Kona ba linha Fronteira Alkatiri dehan,” Se uluk mak bele diskute Fronteira ami diskuti tiha Fronteira ona, mas Australia sei fo dalan para diskute Fronteira, ita bele nafatin ita nia direitu, ita bele ezizi nafatin maibe ita seidauk hatene lolos dalan ida ne’ebe mak bele badak liu para ita atu hetan reseitas katak rekursu iha atu halao dezenvolvimentu. Mari Alaktiri mos dehan tan, Timor Leste iha direitu ba linha Fronteira, maibe presiza iha akordu ne’ebe mak governu Timor Leste ho Australia iha hotu vontade ba akordu ne’ebe refere. 

“Ita iha direitu maibe ita labele haluha, ita ejiji nafatin Fronteira lina mediana ne’e ita nia direitu ne’e sira labele mete, maibe presiza akordu, akordu ne’e signifika rua ne’e se ita iha vontade hotu para atu hetan akordu, se ida deit laiha vontade atu hetan akordu, entaun ita buka dalan seluk,” komenta Alkatiri.
,

Sem comentários:

Publicar um comentário

Nota: só um membro deste blogue pode publicar um comentário.