sexta-feira, 22 de março de 2013

Mate Restu 12 Novembru Balun Ameasa Komunidade “Gregorio: Sei Pending Sira Nia Direitu”

.

Jornal Nacional Diario - Sesta-Feira, 22 Marsu 2013 

Prezidenti Komite 12 Novembru, Gregorio saldanha, identifiak mate restu 12 Novembru balun oras ne’e dadauk utiliza naran ne’e hodi ameasa fali komunidade. 

“Ami iha dadus duni kona ba ne’e, maibe ami la kohi fo sai membru se mak involve iha laran, ami sei bolu kolega sira ne’e atu fo atensaun ba sira, labele halo hanesan ne’e uza naran mate restu 12 Novembru amesa komunidade tanba ladiak, ami sei pending sira nia direitu,” dehan Gregorio Saldanha ba Jornalista Kinta (21/3) Novembru, balide, Dili. 

Aleinde ne’e, Gregorio dehan, iha mate restu balun mos uza naran veteranus hodi halo presaun no ameasa atu hetan projektu husi Estadu. “prosesu ruma atu hetan direitu pensaun ruma ka hetan medalha ruma ami haree ba buat sira ne’e ameasa fali ema hodi naran ne’e ami bele pending sira nia prosesu sira ne’e,” dehan Gregorio. 

Nia mos afirma katak,” Ita ne’e luta dor, ita ne’e funu nain, ami ne’e sempre hateten ita ne’e funu nain mate restu, ita tenke sai ezemplar, ita dehan ita mak harii uma ne’e,” tenik Gregorio Saldanha. 

Atu halakon atetude hirak ne’e, Komite 12 Novembru hasai nia hanoin katak, Primeiru atu utiliza mate restu 12 Novembru ka veteranus hodi halo buat diak, laos pratika hahalok kontra normas ne’ebe mak moris iha sosiedade nia leet hodi halo ema seluk sai vitima. 

Segundu, atu ema ne’ebe hanaran an mate restu 12 Novembru ka veteranus tenki sai mata dalan no ezemplar ba buat idak hodi halo ba ema seluk, liu-liu ba jerasaun foun. 

 Ba dala tolu, mate restu 12 Novembru ka veteranus sira tenki sai husi hun (fontes) atu rezolve no hakotu problemas ne’ebe mosu karik suku ka aldeia laos sai fali hun hodi hamosu no hanaruk tan problema. Ba dala ikus, atu mate restu 12 Novembru da veteranus tenki sai nudar ajente hodi koopera ho autoridade sira hodi hametin estabildiade iha komunidade nia leet hodi nune’e bele garante dezenvolvimentu nasional. 

“Ita la konkorda atu ema ida ka rua ne’ebe gosta halo problema hodi estraga naran boot 12 Novembru ho veteranus sira, no Povu Timor Leste tomak ho jerasaun foun sira bele fiar ho laran metin nafatin katak, Loriko Aswain ka ema rejistensia sei hamriik nafatin nuudar autores ba dezenvolvimentu nasional, hanesan uluk sira hatudu ona ho displina ho brani haraik ba iha oin nudar autores ba luta libertasaun nasional,” haklaken Gregorio Saldanha. 
.

Sem comentários:

Publicar um comentário

Nota: só um membro deste blogue pode publicar um comentário.