quinta-feira, 14 de março de 2013

PM Xanana ‘Sibuk’ Hamos Fo’er “Membru Governu Deskansa”

.

Jornal Nacional Diario - Kinta-Feira, 14 Marsu 2013 

Primeiru Ministru Kay Rala Xanana Gusmao preokupadu ‘sibuk’ hamos foer iha ponte Aitarak laran nian husi tuku 5 loraik to’o tuku 11:30 meia noite, maibe membrus governu balun la liga ninia xefi governu ne’e hamos hela foer. 

Xefi Governu akompania husi Sekretariu Estadu seguransa, Francisco Guterres, Sekretariu Estadu eletrisidade, Januario Pereira no Sekretariu Estadu Politika Formasaun Profesional e Empregu, Ilidio Ximenes no mos Prezidente CNT Jorge Serano no mos diretor kompania Suai Indah hodi hamos foer iha Ponte Aitarak laran. 

Tuir observasaun JNDiario nian iha terenu nota katak, Primeiru Ministru Xanana Gusmao tuir lolos ne’e hakarak observa prjeitu taka estrada ne’ebe koperasaun entre CNT ho Obras Publiku, ADN, DNTT ho Polisia Nasional Timor Leste, tamba atu monta beton iha ponte Comoro II, maibe to’o iha Aitarak laran kompania halo ponte aitarak laran ne’e tesi ai-hun boot rua husi estrada sori-sorin ne’ebe halo estrada fo’er, tanba ne’e PM Xanana Gusmao tun husi kareta hamoos foer sira ne’e. 

 Nune’e, estrada parte ponte Aitarak laran ne’e tahu oituan entaun Primeiru Ministru tun raut no haruka Bombeiros rega mos tahu ne’ebe iha estrada laran, maske xefi governu ne’e hatais hela roupa moos servisu nian, maibe ba raut tahu foer sira ne’e. Membru governu ne’ebe akompania PM Xanana Gusmao ne’e, membru governu husi partidu CNRT nian de’it, laiha membru governu husi partidu seluk iha bloku koligasaun. 

Iha fatin hanesan, Polisia Nasional Timor Leste taka dalan iha Ponte Aitarak laran ba Comoro, kareta ne’ebe halai dirasaun Comoro nian tenki tun ba Farol nian, tanba dalan husi Palcio Governu nian ba Comoro taka metin. 

Projeitu taka dalan ne’e sei to’o fulan ida, hahu husi 13 Marsu to’o 13 Abril tanba projeitu konstrusaun ponte Comoro II ne’e CNT ho WIKA-Indonesia tenki finaliza iha meu tinan ne’e, projeitu taka dalan ne’e sei hala’o de’it iha tempu kalan atu nune’e labele intorompe movimentu trafiku iha tempu loron.
.

Sem comentários:

Publicar um comentário

Nota: só um membro deste blogue pode publicar um comentário.