quinta-feira, 21 de março de 2013

“TL-Australia Kontinua Buka Solusaun Ba Akordu CMATS”

,

Jornal Independente - Kinta-Feira, 21 Marsu 2013 

Governu Timor Leste (TL) ho Governu Australia oras ne’e dadaun sei kontinua buka hela solusaun ba akordu Certain Maritime Ageement on Timor Sea (CMATS). 

Ministru Petrolium no Rekursu Naturais, Alfredo Pires hateten, akordu CMATS ne’e nasaun Timor Leste no Australia sei buka hela solusaun oinsa mak atu determina akordu ne’e. 

“Ita sei buka hela solusaun ida ne’ebe fo igualidade ba ita hotu, Timor Leste agora dadaun koalia hela ho ita nia vizinhu (Australia) para ita haree oinsa ita lao ba oin,” dehan nia ba Jornalista sira hafoin asina MoU iha Fomentu-Dili, (20/3). 

Tuir Alfredo, Akordu CMATS depende ba Timor Leste no Australia mak tenki determina ka kontinua fali tuir akordu ne’ebe mak rai rua ne’e halo tiha ona. 

“CMATS ita halo ho Australia to’o 2023 mak foin remata, ne’e so Timor Leste ho Australia hakarak termina ne’e bele, mas kontratu ne’e rasik mos dehan katak, se karik determina agora ka hein tan tinan 10, se Greater Sunrise seidauk lao entaun kontratu ne’e mos tenki-ser lao,” dehan nia. 

Alende ne’e, Alfredo dehan tan katak, partisipasaun entidades iha negosiasaun Greater Sunrise (GS) importante mak tau interese nasional. MPRM ne’e mos dehan, prosesu negosiasaun kontinua lao no nia parte fiar katak ho lideransa primeiru Ministru xanana Gusmao no Prezidenti da Republika buka solusaun ne’ebe diak liu no tuir direitu Timor Leste nian. 

Pires akresenta, Governu halo ona estudus liu husi kompania boot rua, husi Amerika no Malaysia inklui liu husi estudus sira ne’e, Timor Leste sei lakon osan, tanba Timor Leste minimu bele hetan reseitas bilaun U$20 dollar Amerikanu. 

Nune’e, nia dehan, Timor Leste labele dukur iha area negosiasaun tanba oportunidade bele ba fali ema seluk no nia parte husu ba estudante sira iha area petroleum atu lalika halimar ho estudus sira iha area petroleum, tanba valor la to’o 3 nia parte sei hasai no fo fali oportunidade ba Timor-oan seluk.
.

Sem comentários:

Publicar um comentário

Nota: só um membro deste blogue pode publicar um comentário.