terça-feira, 9 de abril de 2013

“Deskonfia Osan Tokon U$ 10 Lakon”

.

Jornal Independente - Tersa-Feira, 09 Abril 2013 

Eis Vice Primeiru Ministru, Mario Carrascalao relata katak, osan tranzisaun husi Governu FRETILIN ba governu Aliansa Maioria Parlamentar (AMP) osan hamutuk tokon U$150 mak lakon. 

Durante kaer ukun hamutuk iha tempu AMP nian, nia rona husi Ministras financas, Emilia Pires katak, osan tranzisaun ne’ebe governasaun FRETILIN hato’o ba AMP hamutuk tokon U$150 laiha justifikasaun. 

“Iha tempu Governu AMP nian hau rona husi Ministra Financas rasik katak, husi osan tranzisaun Governu FRETILIN nian ne’e iha U$150 Milloens seidauk hetan justifikasaun,” tenik Carrascalao. 

Ministra Emilia mos konfesa ba esi Primeiru Ministru katak, laiha relatoriu ruma kona-ba orsamentu ne’e utiliza ba saida no orsamentu ne’e lakon de’it, tanba la justifika loloos. 

Entertantu, Mario Carrascalao mos dehan tan katak, atu implementa Kamara Munisipiu tenke kria estrutura ne’ebe bele kontrola ema sira ne’ebe jere orsamentu ba desentralizasaun ne’e, atu labele hasoru korupsaun iha loron ikus mai. 

 Nune’e, Director organizasaun Naun-Govermental Luta Hamutuk, Mericio Akara preokupa osan ho montante boot ne’ebe Governu gasta harii kamara munisipiu iha Distritu haat (4), maibe nia rejultadu edifisiu balun abandona. Total orsamentu estadu harii Kamara Munisipiu hahu iha tinan 2009-2011 iha Distritu hat hamutuk tokon U$7. 

Edifisiu Munisipiu Distritu Dili total orsamentu tokon US$ 1,750, Distritu Baucau tokon U$1,750, Bobonaro tokon U$1,750 no Distritu Oekusse tokon U$1,750. Husi total orsamentu tokon US$7 ne’e, Distritu Dili, 2009 gasta rihun U$5, 2010 gasta rihun U$US$7,50, no 2011 gasta rihun U$5, nune’e, gasta orsamentu ba implementasaun kamara munisipiu iha distritu seluk mos hanesan.
.

Sem comentários:

Publicar um comentário

Nota: só um membro deste blogue pode publicar um comentário.