quinta-feira, 18 de abril de 2013

“Maijen Lere Apoia PM Xanana Taka CPD-RDTL”

.

Jornal Nacional Diario - Kinta-Feira, 18 Abril 2013  

Chefi Estadi Maior Jeneral Forsa Defesa Timor Leste, Maijor Jeneral, Lere Anan Timur Apoia total deklarasaun Primeiru Ministru ne’ebe mos nu’udar Ministru Defesa no Seguransa, Kay Rala Xanana Gusmao atu taka grupu CPD-RDTL. 

“Hau hanoin katak Primeiru Ministru iha pozisaun diak, sira sei nafatin taka, hau mos koalia ho sira (CPD-RDTL-red) ital abele halo estado ida iha estado ida nia laran, imi (CPD-RDTL-red) dehan katak la konkorda, la simu konstituisaun imi sala ona,

”Maijen Lere Anan Timur deklara ba Jornalista sira Kuarta (17/4) hafoin enkontru semanal ho Prezidenti da Republika (PR), Taur Matan Ruak iha Palacio Prezidenti, Bairo-Pite, Dili. Antes ne’e Primeiru Ministru Kay Rala xanana Gusmao ameasa taka CPD-RDTL tamba grupo CPD-RDTL sosa fali farda militar nian husi Indonesia. Lere Anan Timor mos dehan tan, farda military ne’ebe mak grupo CPD-RDTL uza ne’e konsidera mangame liu, tanba iha nasaun ida militar ida de’it. 

 “Farda ne’e hanesan ne’e, ne’e sira mos mangame, ne’e maka hau hateten, ne’e ital abele halo Estadu ida iha estado ida nia laran, ita Estado se Estado iha ona forsas armadas, ida agora nusa mak CPD-RDTL agora halo tan? Ne’e Quer Zer sira hakarak koko Estado,” Lere haklaken. 

Maijor Lere hateten, se deit iha rai nee mak hakarak kria instabilidade sei la tolera, tanba rai lulik Timor sosa ho ran no ruin ema hotu tenki kontribui ba dezenvolvimentu pais ne’e. 

 “Hau hatete ba sira, imi hanoin katak Estado sosa kilat ba F-FDTL be tara iha ne’eba atu infeita an ka? Ne’e ba oho ema sira ne’ebe ke kontra nasaun ne’e, ne’e mak hau dehan ital abele halimar ho situasaun, ita hotu-hotu halo funu, balu terus liu, ne’e mak diak liu agora ita hakmatek halo oinsa para ita nia nasaun ne’e la’o ba oin, ida ne’e mak importante,” deklara Lere. 

 Iha oportunidade ne’e, Jeneral fitun rua ne’e apela ba grupu Massa CPD-RDTL atu kontribui ba estabilidade, tanba ema hot uterus ba rai ida ne’e. 

 “Hau rekomenda ba masa CPD-RDTL hotu-hotu hatene, hau mos hatene imi barak terus ba rai ida ne’e, ba ukun an ida ne’e, entaun se agora ita ukun an, ita tenki submete integra ita nia an ba buat ne’ebe mak ita nia Estado hatuur ba ne’e, ne’e mak importante liu, labele inventa tun sa’e, sira halo demais sira la konkorda, la konkorda ne’e uluk iha ai laran karik, bolu sira reasionariu tanba kontra ita nia prinsipiu sira nian ne’e, tanba agora ita ukun an ita tolera malu,” afirma Lere.
.

Sem comentários:

Publicar um comentário

Nota: só um membro deste blogue pode publicar um comentário.