quinta-feira, 4 de abril de 2013

Situasaun Korea Manas “Trabalador Timor-Oan 1188 Sei Evakua”

.

Jornal Timor Post - Kinta-Feira, 04 Abril 2013 

Governu halo ona kordenasaun ho Governu Korea do Sul atu evakua trabalador Timor-oan 1188 ba fatin ne’ebe seguru bainhira problema ruma mosu, relasiona ho situasuan politika iha nasaun refere. 

“Korea do sul no Korea do Norte iha duni problema maibe ita nia embaixada no adidu sempre iha koordenasaun diak ho Governu Korea do sul bainhira deit iha problema, sira pronto atu evakua trabalador sira ba iha fatin ne’ebe seguru,” dehan Ilidio Ximenes ba Timor Post iha nia servisu fatin (3/4). 

 Sekretariu Estadu hatutan, fatin ne’ebe Governu Korea do Sul prepara ba trabalador Timor oan sira, ida ne’e segredu tanba labele fo hatene. 

Nia dehan, informasaun ne’ebe simu husi adidu iha Korea do Sul katak, situasaun sei lao normal hela, ne’ebe trabalador ida-idak sei servisu hela tuir ida-idak nia area. 

 Kona ba inan aman ne’ebe seidauk hatene informasaun ne’e, Sekretariu Ilidio dehan, konserteza inan aman trabalador balun hatene ona no balun seidauk hatene maibe nia husu atu lalika laran taridu. 

 “Hau nia mensajen mak ne’e, husu ba inan-aman sira lalika laran taridu no laran susar tanba governu Timor leste sempre iha kordenasaun diak ho Governu Korea do sul atu fo nafatin protesaun ba trabalador sira bainhira mosu problema ruma,” dehan nia. 

Entertantu, trabalador Timor oan sira iha Korea do Sul to’o oras ne’e halao servisu normal hela, maibe, so rona husi notisia iha media lokal sira maka koalia namanas kona ba ameasa malu entre nasaun Korea Sul no Korea Norte. 
,

Sem comentários:

Publicar um comentário

Nota: só um membro deste blogue pode publicar um comentário.