quarta-feira, 15 de maio de 2013

“Alkatiri: Sedu Liu Kria Eventu Miss Timor”

.

Jornal Nacional Diario - Kuarta-Feira, 15 Maiu 2013 

Eis Primeiru Ministru (PM) Dr. Mari Alkatiri konsidera Ministeriu Turismu e Kultura (MTK) sedu liu kria eventu Miss Timor. 

Ba Jornalista sira Tersa (14/5) iha ninia rezidensia Farol, Dili, Eis Primeiru Ministru Mari Alkatiri deklara eventu Miss Timor ne’e ba interese grupu ninian laos interese nasional. 

 “Bah au seidauk to’o, hau laos dehan katak labele iha divertimentu, povu presiza duni diversaun, ita hakarak aban baun rua ita foti ita nia Miss ida ke sai fali hanesan embaixadora Timor nian ba rai liur laos deit para hatudu dehan beleza deit mas hatudu nia matenek mos, ne’e mak hau hakarak,” afirma Alkatiri. 

 Nia dehan, eventu refere tenki planeia ho didiak no tetu hamutuk nune’e bele fo mos rejultadu ne’ebe mak diak iha futuru ne’ebe sei reprezenta feto. 

“Miss Timor ne’e tenki halo lolos par abele fo marka ida ba ita nia reprezentasaun feto ne’e ba iha liur ke diak, ke bele defende feto nia direitu, igualidade feto ho mane, se lae ita halo sasan narnaran deit, diak liu ita para, ita hanoin hamutuk saida mak bele halo diak liu ba ita nia rain,” haklaken Alkatiri. Eis PM iha primeiru Governu Konstitusional, Mari Alkatiri sublinha, presiza kria uluk kondisoens ne’ebe mak diak hafoin halao eventu refere. 

 “Diak liu ita fo tempo para prepara, para aban bain rua kuandu ita foti ita nia Miss ida laos hatudu deit dehan nia furak mas hatudu katak nia mos matenek, ne’e para reprezenta rai ne’e sai embaixador ba rai ida ne’e,” tenik nia. Mari Alkatiri dehan tan katak, atu sai Miss Timor ka embaixadora cultural no sai embaixadora ne’ebe atu defende feto nia direitu iha fatin hotu-hotu. 

“Se mak ita hili tanba nia hatene aprezenta nia an, nia hatene nia matenek hodi konhese ita nia istoria, kuinhese istoria mundu ne’e i nia konhese direitu feto nian para atu defende, ne’e aban bain rua see nune’e it abele ona lao ba oin, agora diak liu ita prepara lai,” koalia Alkatiri. 

Maske nune’e, Primeiru Ministru (PM) Kay Rala xanana Gusmao ho Primeira Dama Timor Leste Isabel Ferreira apoia eventu refere, maibe iha parte seluk sosieade sivil sira inklui organizasaun feto iha Timor Leste sujere atu kansela eventu ne’e. 
.

Sem comentários:

Publicar um comentário

Nota: só um membro deste blogue pode publicar um comentário.