terça-feira, 28 de maio de 2013

“Governu Diskrimina ‘Perdiem’ FP-PNTL”

.

Jornal Nacional Diario - Tersa-Feira, 28 Maiu 2013 

Membru Parlamentu Nasional (PN) lamenta tebe-tebes diskriminasaun perdiem entre Funsionariu Publiku (FP) ho Polisia Nasional Timor Leste (PNTL) nebe Governu fo. 

Perdiem ba funsionariu publika kada loron ida visita ba Distritu ho osan U$40, maibe membru Polisia Nasional Timor Leste (PNTL) viazen ba Distritu loron ida ho deit perdiem U$20. 

Ho diferensa ne’e membru PN sira husu ba governu atu hadia sistema jestaun tanba servisu polisia sira nian kuaze loron kalan moris dalan. “Ami kestiaona maka’as tanba ami nia haree buat ne’e la justu (la diak), ne’ebe ita hare hanesan diskriminasaun boot ida ba funsionariu kikuan sira ho Polisia Nasional Timor Leste tanba iha aprovasaun orsamentu iha lei ne’e hateten katak, U$40 por dia katak, atu ba toba ka fila mos tenke U$40 Dollar, maibe agora dadaun buat ne’ebe sira implementa na realidade ne’ebe hatudu katak, PNTL sira husi Distritu desloka mai iha nasional U$20 Dollar, kuitadu sira la’o kuaze loron tomak ida, kalan tomak ida, sira iha dalan maibe sira tenke obriga a’an hodi fila tamba sira hetan U$20 dollar,” hateten Deputadu Leonel Marcal ba JNDiaro iha PN, segunda (27/5) horseik. 

 Deputadus sira iha PN kestiaona mak hanesan perdiam loron ida aprovadu mak U$40 Dollar ba sira ne’ebe mak mai husi Distritu no ba iha nasional maibe realidade sira hetan U$20 Dollar deit, pior liu mak PNTL sira ne’ebe husi nasional mak wainhira ba Distritu ne’e ninia perdiam foti kedas liu-liu ba ema boot sira. 

 Deputadu Leonel kontinua kestiaona mak ba sira kikuan sira husi Distritu mai iha nasional laos foti kedas osan perdiem, maibe hatama deit BOQ surat jalan to’o fulan 5 ou 6 dala ruma to’o tinan mos seidauk halo pagamentu, koitadu, ne’e hatudu katak ita rasik halo deskriminasaun boot ba ita nia funsionariu sira, tamba sira mos servisu fo apoiu halo sosializa ba Estadu ho Governu ida ne’e, laos ema boot deit. 

“Hare ba problema hanesan ne’e mak ita sente nasaun ne’e laiha balansu, la justu, haree ninia foin sa’e kikoan sira ne’e la dun tau atensaun, tanba ne’e mak ami ohin husu ba governu atu hadia sistema sira hanesan ne’e, atu la bele iha sentimentu diskriminasaun,” dehan Deputadu ne’e ho laran triste. 

Antes ne’e, Jornalista JNDiario iha konfersas informa ho membru F-FDTL balun katak, husi F-FDTL mos iha perdiem ne’ebe kiik kompara ho Funsionariu publiku sira. 

Maske nune’e, membru F-FDTL ne’e la mensiona kuantidade perdiem ba F-FDTL nian. 
.

Sem comentários:

Publicar um comentário

Nota: só um membro deste blogue pode publicar um comentário.