quarta-feira, 29 de maio de 2013

Hili Komandante Foun; “Pro-Kontra Mosu Iha Instituisaun PNTL”

.

Jornal Independente - Kuarta-Feira, 29 Maiu 2013 

Publiku liu-liu membrus polisia Nasional Timor Leste balun hahu preokupa ona komandante PNTL foun ne’ebe sei hetan nomeia husi Primeiru Ministru Xanana Gusmao. 

Pro ho kontra mosu ona iha publiku, liu-liu instituisaun PNTL, membru PNTL balun apoiu Komisariu Longuinhos Monteiro kontinua ba komandante no balun apoiu lider foun husi kareira professional tuir lei haruka. 

Antes ne’e, Ofisiais PNTL ida ne’ebe la kohi publika nia naran hateten, tuir informasaun ne’ebe nia hetan katak, Komandante Afonso ho Superitendente Xefi Mateus mak sai kandidatu forte hodi troka komandante Jeral Komisariu Longuinhos Monteiro. 

 Maibe, membru PNTL balun kontra ideia ne’e, tuir membru PNTL husi Corpus Seguransa Pessoal balun hateten, Komisariu Longuinhos Monteiro sei lidera nafatin komandante Jeral PNTL, hafoin desidi liu husi konsellu seguransa. 

“Konsellu seguransa desidi mandatu Komisariu Longuinhos Monteiro husi tranzitoriu ba mandatu definitive,” dehan fontes ne’e ba INDEPENDENTE. Fontes ne’e dehan, mosu pro kontra iha instituisaun PNTL nia laran, tanba balun apoiu komisariu Longuinhos atu kontinua no balun la apoiu. 

Maski nune’e, desizaun hotu-hotu iha Primeiru Ministru Xanana Gusmao nia liman, nuudar mos Ministru Defesa Seguransa. 

Nune’e Xanana hateten, konsellu superior sei fo sai naran komandante Polisia Nasional Timor Leste (PNTL) depois periodu tranzito ne’ebe mak sei remata iha loron segunda 27 Junu tinan ne’e. 

“UNMIT hakotu lolos kedas nee iha 31 Marsu, ne’ebe tempu ida nene’e ami prepara atu hakotu periodu tranzitoriu, ne’ebe periodu foun ne’ebe iha dehan katak, Policia iha kbiit rasik ne’e depois 27 Junu, ne’ebe sei iha fulan ida atu koalia ida ne’e,” hataten PM Xanana iha Palaciu Prezidensial (27/5). 

Xanana mos promete katak, hafoin nomea komandante foun, nia sei hasoru membru PNTL tomak hodi deskute sira nia problema oi-oin atu rejolve, inklui mos oficiais F-FDTL.
.

Sem comentários:

Publicar um comentário

Nota: só um membro deste blogue pode publicar um comentário.