sexta-feira, 31 de maio de 2013

MS La Tau Atensaun; “Kous Mate-Isin Iha Timor Plaza Oin”

.
Foto daqui
Jornal Independente - Sesta-Feira, 31 Maiu 2013

Labarik kiik ida, Etelvina Gama (8), iis kotu iha dalan klaran bainhira famili lori atu ba kontinua halo tratamentu saude iha Hospital Nasional Guido valadares (HNGV), Taxi ne’ebe tula matebian hatuun de’it mate isin iha Timor Plaza nia oin.

Matebian nia prima, Celestina de Jesus, kous deit matebian iha estrada ibun hodi hein ema ruma bele laran diak atu tula sira fila ba uma, Ambulansia ne’ebe sai hanesan esperensia ikus mos la dauk mosu mai, kuaze oras tolu nia laran, hahu husi tuku 2 to’o tuku 4 lorkraik, Celestina ho nia primu Manuel troka malu kous mate isin.

“Ami sae taxi husi rai kotu atu ba ospital, to’o ha ne’e (Plaza oin) labaraik nia ulun tabele ona (iis kotu), kundutor dehan nia labele tula ema mate, nia haruka ami tuun deit iha ne’e,” Konta Manuel iha Timor Plaza oin, Kuarta (29/5).

Matebian nuudar oan feto husi Abilio Sousa no Aguida Gama, Husi Suku Kailaku, Sub Distritu Hatulia, Distritu Ermera, iha Sesta (17/05), Etelvina ne’ebe sofre moras fuan (jantung) transfere husi Ospital Gleno, Ermera mai Ospital Nasional, Dili.

 Eltelvina halo tratamentu saude durante loron 9 iha ONGV iha sala kritika, pediatria, iha Domingu (29/5), Celestina ne’ebe hein, husu ba enfermeiru atu bele fila ba uma tanba haree katak dutor sira la halo diagnosa (periksa) ba Etelvina.

 “Nia la han durante loron 4, maibe doutor nunak perikas, doutor dehan diak hela, ai-moruk sira fo labarik muta sai hotu, ami husu atu lori fali ba uma, doutor dehan diak lori ba fulan oin fali lori alin mai sona,” dehan Celestina ho mata be’en. Ho esperensa karik, iha uma labarik bele han no rekopera neineik, Celestina lori Etelvina ba hela iha familia balun nia uma iha rai-kotu, Komoro, maibe kondisaun Etelvina aumenta aat.

Ba kestan ne’e, Enfermeiru sira iha sala pediatria informa katak, familia Etelvina mak gakarak atu fila no asina karta alta obrigatoriu.

Tuir sira, bainhira transfere husi Opsital Gleno mai ONGV doutor koloka labarik ne’e iha sala kritika ne’ebe hetan atensaun masimu.

 “Labarik ne’e enfrenta moras fuan, sira ne’ebe koloka iha sala kritika ne’e hetan atensaun espesial, kada oras rua ami sempre Check,” dehan Enfremeira ida ne’ebe lakohi publika nia identidade.

Fonte ne’e dehan, Celestina Obriga fila ho razaun nia aman mate no la iha ema mak atu hein Etelvina iha Ospital.
.

Sem comentários:

Publicar um comentário

Nota: só um membro deste blogue pode publicar um comentário.