terça-feira, 21 de maio de 2013

“PM Xanana, TL Seidauk Ukun-An”

.

Jornal Nacional Diaro - Tersa-Feira, 21 Maiu 2013

Iha eventu Divulgasaun planu no Programa Desentralizasaun camara Municipio, ne’ebe mak hala’o iha Distritu Baucau, Primeiru Ministru (PM) Kay Rala xanana Gusmao mos, realidade povu nia moris ne’ebe maka durante ne’e akontese iha baze, Primeiru Ministru Xanana Gusmao mensiona katak, Timor Leste (TL) seidauk ukun an loloos, tanba tinan sanolu resin ida ona TL independensia, maibe povu sei kontinua sofre no mate iha area rurais.

Tuir Xanana Gusmao, situasaun ida ne’e akontese, tanba matenek nain Timoroan sira hotu la hamutuk, hodi liberta rai no povu ida ne’e husi terus ida ne’e, maibe sira preokupa de’it ho sira nia interese privadu.

“Ita seidauk ukun-an loloos, tanba ami sira ne’e moris diak ona, hetan kareta vidru metan, halai iha komunidade sira nia let, rai rahun sae, povu nia oan sira han rai rahun no moras, maibe telefone ba ambulansia tula ba hospital, mina laiha,” Hateten xefe Governu Kay Rala Xanana Gusmao, Iha Estadiun Vila Nova Baucau, Sabadu (19/5), wainhira hato’o informasaun kona ba divulgasaun planu no programa Desentralizasaun Camara Municipio.

Xanana Gusmao hatutan katak, povu to’o agora sei sofre no mate nafatin, tanba administrasaun no jestaun rai ida ne’e mak sei fraku. Funsionariu sira mos barak mak malandru, dala barak sira la hatene saida mak importante duni sira atu hala’o, no saida mak sira atu halo iha sira nia serviso fatin loro-loron,” Xanana realsa.

Tanba ne’e, katak Xanana Gusmao, Municipio ida ne’e atu fo valor ba povu nia terus no nia sakrifisiu ne’ebe povu sofre durante tinan 24 nia laran, Xanana dehan tan katak, Timoroan hotu-hotu atu buka kna’ar ne’ebe los, atu hadia buat hotu hodi valoriza povu ida ne’e ninia sofrementu.

Xefi Governu ne’e mos akresenta katak, seitor privadu no intelektuais Baucau oan sira atu prepara-an didiak ona antes Municipio tama iha Distritu ne’ebe maka konesidu ho naran sidade ‘Kulgisa’ ne’e.

 Xanana mos enkoraza, autoridade lokal sira atu komesa book-an, fahe informasaun ba povu, kona ba objektivu husi municipio ne’e rasik, atu nune’e povu mos bele komprende.

“Hau lakohi rona iha Distritu ne’e atu fahe malu, atu partisu politiku, veteranus ou Joventude, imi hotu tenki hamutuk ho hanoin ida de’it ba Municipio ida ne’e,” Xanana husik hela lia menon.
,

Sem comentários:

Publicar um comentário

Nota: só um membro deste blogue pode publicar um comentário.