quarta-feira, 29 de maio de 2013

Primeiru Julgamentu, “Deskonfia Borlaco Halo Konspirasaun”

.

Jornal Independente - Kuarta-Feira, 29 Maiu 2013 

Tribunal Distrital Dili (TDD) hala’o primeiru julgamentu ba krime abuju de poder no frau de fiskal ne’ebe komete husi arguido Francisco da Costa Soares ‘Borlaco’ atual Sekretariu Estadu Fortalesementu Institusional ho Arguidu Mariano Malik nuudar Diretor kompania Tiarra Suplayuer Ltd. 

Tuir akuzasaun Ministeriu Publiku (MP) iha audensia julgamentu katak, iha loron 29 fulan Agusto tinan 2009, arguidu Borlaco aprova karta hodi sosa kareta kaminota tolu ba Ministeriu Edukasaun hodi fasilita merenda eskolar. 

 Aprovasaun ne’e halo, bazeia ba proposta husi Ministeriu Edukasaun ba Dirasaun Nasional servisu aprovizionamentu Ministeriu Finansas. 

Iha proposta ne’e husu osan ho valor U$90.000,00 dolar Amerikanu atu sosa kareta kaminota tolu, no kada kaminota ida U$29.000,00. Maibe rejultadu hatudu oin seluk katak, invoice ne’ebe kompania Sinarias haruka ba Ministeriu Edukasaun ho montante tokon RP150 kada kaminota (U$16,304,00,00) signifika katak, folin kareta ne’ebe Ministeriu Edukasaun sosa la tuir montante iha prosesu tender. 

 Tan ne’e, Ministeriu publiku akuza arguidu Borlaco hanesan autor material ba krime abuzu poder no arguidu Mariano Malik nuudar autor ba krime frau de fiskal. 

 Francisco Borlaco rejeita akuzasaun ne’e katak, proposta sosa kareta mai husi Miniteriu Edukasaun, parte aprovizionamentu fasilita deit loke tenderizasaun ne’ebe nia prosesu selesaun kompostu husi ema nain tolu mai husi Ministeriu Financas no nain ida husi Ministeriu Edukasaun. Iha momentu ne’eba, nuudar Diretor jeral nia rona deit esplikasaun husi ekipa juri ba tenderizasaun katak prinese kriteriu nia aprova, laos atu estuda tan proposta kompania nian. 

Tanba dehan nia, fo konfiansa tomak ba ekipa avaliasaun mak halo selesaun ba prosesu tender katak, loos ona nia hein aprova, nia dehan, tuir ekipa avalisaun katak, kada kareta kaminota ida ho folin U$29.250,00. 

Nune’e, dehan nia kareta kamioneta rua ne’ebe hatama husi kompania sinarais husi Atambua katak, kareta kaminiota ida ho valor tokon RP.150 nia laiha konesementu, nia mos konsidera sosa kareta ne’e la tuir sistema tenderizasaun ne’ebe ekipa avaliasaun halo selesaun. 

 Entertantu, arguidu Mariano Malik konfesa katak, nia kompania halo duni kontratu ho Sinarias atu sosa kareta tolu, ho valor kada kamioneta U$27.750,00, valor ne’e inklui ona impostu no seluk tan, nia mos deklara, lahatene karta husi Sinarias ba Ministeriu edukasaun katak kada kareta ho valor RP150 jutas. 

Arguidu Borlaco hetan asistensia legal husi defensor cancio Xavier no Andre Jeroto no Arguidu Mariano Malik hetan asistensia husi advogadu provadu Afonso Gomes. 

 Primeiru Julgamentu ne’e, lidera husi Juiz koletivu Jacinto Correia, Julio Gantes, Antonio Helder do Carmo. 
,

Sem comentários:

Publicar um comentário

Nota: só um membro deste blogue pode publicar um comentário.