terça-feira, 21 de maio de 2013

Uza Osan Estadu Ba Interese KSTL “Eis Sekjer KSTL Ameasadu Kadeia”

.

Jornal Timor Post - Sabadu-feira, 18 Maiu 2013 

Eis Sekretariu Jeral Konsellu Sindikatu Trabaladores Timor leste (KSTL), Roberto hetan ameasa kadeia tinan hat husi Ministeriu Publiku tanba deskonfia uza osan estadu ho valor U$30.000 ba interese instituisaun no privadu balun. 

Prokurador Remigia Fatima liu husi alegasaun husu ba tribunal atu aplika tinan haat kadeia ba arguidu no selu endiminizasaun ba osan estadu ne’ebe uza ona ba interese institusional no interese privadu balun. 

Nia husu mos ba Tribunal atu husu arguidu selu jurus orsamentu estadu, tanba desde tinan 2011 to’o agora osan estadu ho valor U$30.000 seidauk transfer hatudu prejudikasaun boot ba prosesu dezenvolvimentu governu, liu-liu atividade SEPFOPE nian. 

Antes tama alegasaun liu husi julgamentu tribunal rona deklarasaun husi arguidu rekonese,SEPFOPE transfere sala duni osan U$30 mil ba KSTL nia konta bankaria, maibe altura ne’eba tanba sira mos atu halo konferensia internasional ida mak nia autoriza uza osan ne’e, bainhira osan KSTL nia ho valor U$24 mil doadores sira transfere ona mak re-inbolsu fali. 

Entertantu, Eis prezidenti KSTL, Jose da Concecao nuudar sasin hateten, KSTL iha duni koperasaun ho SEPFOPE iha tinan 2011, maibe kona ba kuanditade osan hira mak SEPFOPE oferes ba KSTL, nia la hatene tanba laiha konesementu husi sekjer ho Tezoreiru. 

Maibe, Dezembru 2011 mak nia foin hatene informasaun katak, SEPFOPE halo transfere osan sala ba konta bankaria KSTL ho valor U$30.000.00, bainhira nia hatene informasaun osan hirak ne’e Sekjer ho Tezoreiru halo hotu ona levantamentu husi konta bankaria KSTL nian. 

Nune’e, Marlia nudar tezoreiru mos konfirma nia deklarasaun hanesan ho buat ne’ebe arguidu hato’o ba Tribunal. 
.

Sem comentários:

Publicar um comentário

Nota: só um membro deste blogue pode publicar um comentário.