quinta-feira, 25 de julho de 2013

La Reve Lei Pensaun Vitalisia, “PN Tauk Lakon Futuru”

.

Jornal Nacional Diario - Kinta-feira, 25 Julhu 2013 

Sosieade Sivil Konsidera Membru Parlamentu nasional (PN) to’o ohin loron la reve lei pensaun vitalisia, tanba tauk lakon sira nia futuru previlezu iha povu kiak no mukit nia leet. 

“Sira tauk atu reve, tanba prezudika fali sira nia futuru, laos tempu mak la iha, sira mos hatene se reve lei nee sira rugi, maibe la hatene katak povu iha baze ne’eba atu hetan deit sentavus 0,50 cent susar los, sira nunka hanoin to’o iha ne’eba no halua tiha se mak hili sira tur iha Parlamentu,” Direktu Ezekutivu ONG Luta Hamutuk, Mericio Akara relata asuntu ne’e ba JNDiario Kuarta (24/7) iha ninia kna’ar fatin Farol, Dili. 

Lei pensaun vitalisia halo no aprova iha Primeiru lejislatura Parlamentu nasional (PN) ne’ebe mak lidera husi eis prezidenti PN, Francisco Guterres Lu-olo actual Prezidenti partidu FRETILIN, maske nune’e FRETILIN rasik husu atu halo revizaun ba lei refere hodi redus. 

Nune’e metade orsamentu aloka fila fali ba area seluk ke nudar nesesidade perioridade nasaun ninian. Akara afirma, lei pensaun Vitalisia ne’e perioridade duni atu reve, tanba tinan-tinan ne’e Prezudika orsamentu jeral do Estadu (OJE), tanba selu eis deputadu, membru Governu ne’ebe mak la produtivu (la halo ona serviso) maibe selu nafatin. 

 “Nusa la fo osa ba isra metade deit no metade seluk aloka ba buat seluk hodi alakon pobreza, nune’e povu bele moris diak ho asesu infraestrutura?,” deklara Akara. 

Akara hatutan, PN la dun iha konsensia ba realidade actual povu ninian moris ne’ebe susar buka hahan, osan no susar liu buka nesesidade baziku hanesan be mos, kondisaun estrada la diak iha aldeia suku no teritoriu tomak. 

 “Ho povu nia susar hanesan ne’e sira (membru PN) la intende didiak, hanoin mak sira nia an ne’ebe mak sira moris sufisiente ona hanesan salariu boot, fasilidade, simu tan pensaun vitalisia,” lamenta Akara. 

Iha parte seluk, Julio da Costa hanesan estudante Iniversidade Nasional Timor Lorosa’e (UNTL) komenta liu tan katak, Membru PN sira presiza haree ikas lei ne’ebe refere, tanba lei ne’e benefisia liu ba ukun nain sira, maibe povu mak kontinua halerik, kiak no mukit ba beibeik. 

Ba kestaun ne’e, Deputadu Mateus de Jesus hatete, Komisaun A sei tau perioridade hodi debate lei pensaun vitalisia, maibe partidu tolu (CNRT, FRETILIN no Frenti Mudanca) tenki halo consensus atu reve lei refere. 

 “Hau hanoin atu reve ita presiza hanoin no halo analiza, tanba ita foti desizaun lalais bele sala, nune’e maluk sira eis titulares bele halo problema hasoru PN,” haklaken Deputadu Mateus. 

Jornal Nacional Diario Kinta-feira, 25 Julhu 2013 “Uma MDG’s La Iha Kualidade” Prezidenti Republika (PR) Taur Matan Ruak, husu ba Primeiru Ministru Kay Rala Xanana Gusmao, atu labele halimar demais ho kontraktor ka kompania ne’ebe kaer projeitu laiha kualdiade, tanba rezultadu mak fakar osan Estadu nia maibe projeitu ba uma Millenium Development Goal’s (MDG’s) laiha kualidade. 

Husi komunikadu ba imprensa ne’ebe JNDiario simu katak, Xefi Estadu hatete lia hirak ne’e wainhira hala’o vizita traballu ba fatin ne’ebe mak afeitadu dezastre naturais no vizita familia sira ne’ebe hetan inundasaun iha Suco Aubeon Sub Distritu natarbora, Distritu manatutu iha Kuarta (24/7). 

Iha Vizita xefe Estadu ne’e, komunidade la menta ho uma MDG’s ne’ebe governu halo ba komunidade sira iha suco maibe laiha kualidade no fasilidade ba uma refere la kompletu. 

Tamba ne’e, Xefe Estadu husu ba Primeiru Ministru Xanana Gusmao atu fo sansaun ba kompania ka kontraktor sira ne’ebe kaer projeitu halimar deit, laiha kualidade no fasilidade seidauk kumpletu tanba ema hotu tenki iha lei nia okos. 

“Sira ne’ebe jere nasaun nia osan ladiak tenke responsabliza, laiha ida mak iha lei nia leten, husu Primeiru Ministru atu labele halimar demais ho kontraktor sira, tenke peneliza kontraktor ne’ebe halo obra laiha kualidade,” dehan PR Taur hodi hatan ba komunidade nia preokupasaun ba uma MDG’s. 

Tuir PR Taur iha ambitu halo uma ba familia ne’ebe kbiit laek, Governu halo projeitu halo rohan husik rohan tanba ne’e, Xefe Estadu apela ba PM xanana atu halo obra tenke halo kompletu mak intrega ba komunidade. 

 Husi preokupasaun komunidade kona ba uma MDG’s ne’ebe laiha kualidade no entrega ona ba familia kbiit laek sira, Prezidenti taur husu kompania Bakti Timor Karya (BTK) ne’ebe hala’o projeitu refere tenki finaliza hikas projeitu ne’e, nune’e komunidade bele utiliza. Uma MDG’s ne’ebe Governu liu husi Kontraktor BTK halo ba komunidade kbiit laek iha Suko refere hamutuk 200 resin, maske entrega ona maibe bee mos laiha, rai ka kompleksi seidauk ateru ho diak no sintina mos seidauk kompletu. 

 Entertantu, Vizita Trabalho Prezidenti Republika nian durante loron tolu, hahu husi dia 24 to’o 26 ba Distritu baucau no Viqueque atu haree diretamente vitima dezastre naturais. 
.

Sem comentários:

Publicar um comentário

Nota: só um membro deste blogue pode publicar um comentário.