quinta-feira, 11 de julho de 2013

Rezolusaun Governu: “PSHT-Kera Sakti Simu Desizaun Governu”

,

Jornal Nacional Diario - Kinta-feira, 11 Julhu 2013 

Organizasaun Persaudaraan Setia Hati Terate (PSHT), no Kera Sakti, simu desizaun Governu nian liu husi rezolusaun ne’ebe mak Konsellu Ministru aprova iha Kinta-feira semana kotuk hodi taka totalmente aktividade artemarsiais iha Timor-Leste. 

 “Ami kumpri desizaun neebe Governu hasai ona, tanba Governu mak hanesan orgaun ne’ebe hala’o administrasaun Estadu nian, nia foti desizaun ami simu no ne’e sira nia kompetensia mesmu que ami hatene desizaun refere kontra lei artemarsiais nian numero10/2008 nian,” hateten Sekretariu jeral PSHT, Pedro Aparicio, ba Jornalista sira Kuarta (10/7), iha Hotel Timor, Dili. 

Sekretariu Jeral PSHT ne’e hatutan, kestaun ne’ebe Governu foti hodi taka organizasaun artemarsiais sira ne’ebe nia membru halo krime ne’e, Governu foti fali kestaun politiku hodi ba fali kestaun desportu nian. 

“Ida ne’e mak Governu nia sala ou fallansu iha ida ne’e, to’o akuza fali ninia sidadaun rasik dehan ba jura iha ‘bandeira merah putih’, (Bandeira ema Indonesia nian),” dehan Pedro Aparicio. 

“Koalia asuntu ida dehan ba jura fali iha Bandeira Merah Putih ne’e la los, tanba se hanesan nain ulun Governu nian iha nasaun ida ne’e, hateten warga sira juramentu iha bandeira Merah Putih nia oin, hau rasik mos warga, se hau jura ba Bandeira Merah Putih, hau iha ne’e servisu hanesan advogadu, Presidente Asosiasaun Advogadu Timor-Leste no hau mos nain no oan ba rai ida ne’e, se hau ema Indonesia hau juramente ba Bandeira Indonesia, tanba saida mak fo fiar bah au nafatin,” Hateten Pedro Aparicio. 

Pedro afirma katak, lideransa sira agora kaer Governu ka ukun rai ida ne’e uluk Eskola hotu iha Indonesia nia tempu, sira jura hotu ba Bandeira Indonesia nian, no tanba saida, tanba situasaun, agora sira mai fali ukun ne’e sira sei hakruk ba Indonesia ka la iha ona. 

Nia hatutan tan katak, tuir lolos antes desizaun Governu nian atu hasai dehan taka organizasaun arte marsiais sira ne’ebe kria beibeik problema iha Timor-Leste ne’e, tenke bolu mos lideransa husi grupu artemarsiais sira para husu sira nia opiniaun. 

 “Ami lideransa artemarsiais hakarak hatete deit katak, hahu husi desizaun ne’ebe governu fo sai ne’e katak, ba oin arte marsiais la iha ona, juventude sira ne’ebe durante ne’e hakmula a’an iha organizasaun hotu na, lao imi nian ba, ita nia estadu ne’e estadu de dereitu e estadu demokrasia, membru sira ida-idak buka nia vida, moris luta ba futuru imi nia diak no kumpri nafatin lei ne’ebe mak vigora iha rai ida ne’e,” apela nia. 

 Pedro akresenta, ba oin karik balun mak hakarak treinu fali, ne’e responsablidade estadu nian hodi buak no kaer ba prosesu tuir lei ne’ebe mak iha, labele prosesu tuir fali ida-idak nia gostu. Iha fatin hanesan, Prezidenti Ezekutivu Organizasaun Artemarsiais, Kera Sakti, Martinho Gusmao mos hateten katak, sira nia parte simu desizaun ne’ebe Governu fo sai hodi taka permanente aktividade organizasaun arte marsiais iha Timor-Leste. 

“Ami nia parte simu tamba estadu mak boot liu arte marsiais iha ansaun ida ne’e, iha nasuan ne’ebe deit grupu ida la boot liu fali estadu, ho ida ne’e ami pronto fo kontribui ba desizaun ne’ebe mak Governu hasai,” hateten Prezidenti ezekutivu Kera Sakti ne’e. entertantu, Reuniaun Extraordinariu Konsellu Ministru (KM) loron 2 fulan Jullu 2013, desidi no aprova rezolusaun atu halakon ka taka permanente ho tipu Zero toleranisa grupo artemarsiais tolu hodi hala’o sira nia aktividade. 

Grupo organizasaun ne’ebe mensiona mak hanesan, grupo artemarsiais Persaudaraan Setia Hati Terate (PSHT), Kera Sakti, no mos Kmanek Oan Rai Klaran (KORK). 

Nota komunikadu imprensa ne’ebe mak redasaun Jornal Nacional Diario simu husi media Konsellu Ministru (KM) kuarta (10/7), haktuir katak, rezultadu sorumutu extraordinariu Konsellu Ministru ne’e mos desidi hasai rezolusaun ida hodi fo zero toleransia ba elementu sira husi F-FDTL no PNTL hirak ne’ebe mak sei hola parte iha pratika artemarsiais. 
,

Sem comentários:

Publicar um comentário

Nota: só um membro deste blogue pode publicar um comentário.