sexta-feira, 16 de agosto de 2013

“Miss Timor Manas Iha Kongresu Rede Feto”

.

Jornal Independente - Sesta-feira, 16 Agusto 2013

Programa Miss Timor ne’ebe mak Govenru liu husi Ministeriu Turismu defende metin hodi realiza, kontinua hetan protesta husi maioria feto sira iha kongresu nasional ONG Rede Feto (15/8).

Iha fulan hirak liu ba, ONG sira ne’ebe mak durante ne’e defende Direitu feto sira nia iha Timor Leste hato’o deklarasaun konjunta ida iha kapital, Dili, hodi protesta planu Miss Timor.

Tuir sosiedade sivil sira nia haree katak, programa Miss Timor laos politika diak hodi dezenvolve kapasidade feto sira no buat ne’e la tuir kultura Timor-Leste nian. ONG sira husu atu governu lalika gasta osan ba programa sira ne’ebe laiha valor diak ne’e.

Primeiru Ministru Xanana Gusmao mos konsege kontra maka’as programa ida ne’e, maske nia Ministru Turismu Francisco kalbuady Lay gosta los programa Mis Timor ne’e. Xefe Governu dehan atividade Miss Timor nudar programa baruk ten nian.

Nune’e, iha IV Kongresu nasional ONG Rede Feto iha Delta Nova, Dili, delegada sira husi Distritu sira kontra los programa Miss Timor ne’e. Prezidenti meza ba kongresu nacional rede Feto, Elexandra de Araujo Tilman hateten, rejultadu ikus husi kongresu ne’e mak kongresista sira deklara katak, sira kontra atividade Miss Timor.

 “Konkorda ka la konkorda ida ne’e fo duni dalan katak presiza duni ita levanta, levanta ati governu bele tau matan kona ba Miss Timor ne’e,” hateten Alexandra.

 Nia dehan, kongresista sira dehan diak liu orsamentu husi governu aloka ba dezenvolvimentu feto sira iha area rural sira, laos gasta fali ba Miss Timor.

“Do que gasta osan barbarak ba iha asuntu Miss Timor, diak liu aloka osan ne’e ba iha programa no mehi murak sira ne’ebe mak durante ne’e inan fetin sira buka atu promove,” nia afirma.

Alexandra dehan delegada sira husi Distritu sira hakarak levanta asuntu ne’e iha kongresu tanba sira hakarak programa Miss Timor tama ba diskuasaun nasional ida. Ema hotu tenki preokupa ho asuntu Miss Timor ne’ebe kongresista sira deskute namas iha kongresu, nune’e mos kongresista sira deskute kona ba asuntu feto iha parte justisa no trabaladores sira.

Entertantu, Prezidente Board Rede Feto, Ivete de Oliveira, dehan kongresista sira hakotu ona issu perioridade sira ne’ebe sei transforma ba planu estratejia ne’ebe seguia durante tinan haat (4) ba oin.

Kongresu ne’e rasik partisipa husi kongresista sira husi Distritu 13 ho instituisaun ne’ebe la hanesan, no kongresu ne’e rasik taka husi SEOPFOPE, Ilidio Ximenes da Costa.
.

Sem comentários:

Publicar um comentário

Nota: só um membro deste blogue pode publicar um comentário.