quarta-feira, 18 de setembro de 2013

“Governu Fraku Ezekuta OGE 2013”

.

Jornal Nacional Diario - Kuarta-feira, 18 Setembru 2013 

Falta deit fulan tolu (3) ezekusaun orsamentu Geral Estadu (OJE) 2013 remata ho 100% maibe durante fulan 9 nia laran (Fevereiru to’o Setembru) Governu foin mak ezekuta deit 30,2% (U$497,547,470.89) husi orsamentu US$ 1.6 Biliaun. 

Ho rejultadu ezekusaun ne’e hatudu katak, Governu seidauk iha kapasidade naton atu ezekuta orsamentu nebe iha ba dezenvolvimentu no hasai povu nia moris husi kiak no mukit. 

“Ho rejultadu ezekusaun orsamentu ne’e ki’ik, hatudu Ministeriu no Instituisaun Publiku laiha kapasidade atu halao nia kna’ar nuudar ezekutor planu nasional, husu ba sira (Ministeriu no Instituisaun Publiku) atu halo planu orsamentu tenki sukat mos kapasidade ezekusaun nune’e labele hamosu inbalansu entre orsamentu Ministeriu no kapasidade ezekusaun,” Diretur ezekutivu Luta Hamutuk, Mericio Akara deklara liu husi konferensia da imprensa Tersa (17/9) Farol, Dili. 

Organizasaun naun Govermental ne’e preokupa progresu ezekusaun ne’ebe mosu iha Ministeriu no Instituisaun Publiku, tanba maioria foin atinji 13% to’o 50%, maibe ministeriu sira komesa hato’o submisaun orsamentu 2014 ba Komite Revizaun Orsamentu atu review no formula hodi lori ba Konsellu Ministrus atu debate no aprova nuudar pakote fiskal. 

Nune’e, nu’udar organizasaun ne’ebe sai parseira Governu nian hodi analiza no monitoriza dezenvolvimentu ekonomia rai laran no osan povu nian ba dezenvolvimentu Estadu ne’e, hakarak husu ba Komite revizaun Orsamentu atu halo revizaun profunda ba submisaun orsamentu linhas Ministerial, tanba husi progresu ezekusaun hatudu Ministeriu barak mak laiha kapasidade atu ezekuta osan boot. 

 LH mos husu Primeiru Ministru ne’ebe prezide Konsellu Ministru (KM) katak, antes halo aprovasaun ba pakote fiskal 2014 presiza fo atensaun ba progresu ezekusaun ne’ebe ki’ik, nune’e laprejudika orsamentu 2014, tanba inkapasidade Ministeriu bele prejudika planu dezenvolvimentu nasional no impede objetivu estadu nian. 

 “Iha tinan fiskal 2014 tenki refleta perioridades ne’ebe mai husi sukus, tanba durante ne’e suku barak mak la hetan benefisiu husi implementasaun orsamentu ne’e rasik,” tenik Mericio. 

 Iha fatin la hanesan, Deputadu Bancada FRETILIN, Manuel Castro hatete, implementasaun OJE to’o agora seidauk atinji 50%, ne’e katak, Governu fraku iha planeamentu, tanba PN aprova osan 1.6 Biloens ba Governu atu ezekuta, maibe tanba 1.6 biloens ne’e kontra lei mina entaun ho consensus PN fo deit U$1.3 biloens hodi ezekuta hodi atinji 84% mak Governu bele halo tan pedidu ba PN hodi foti tan, maibe sei la akontese tanba to’o agora seidauk to’o 50%. 

 Entertantu, Primeiru Vice Prezidenti PN Adriano do Nascimento liu husi via Email hateten, iha livru orsamentu ne’e PN fo U$ 1.3 biloens ba Governu atu ezekuta ne’e la kontra lei mina 3%. 

 “Se Governu husu biliaun USD$ 1.6 ne’e liu ona lei mina, atu labele kontra lei mina nian ne’e mak consensus hodi hateten ezekuta lai ba ida 1.3 biloens karik sei presiza mak husu PN foti tan ida restu ne’e,” Adriano afirma. 

Nia hatutan, sira (Governu) sei bele ezekuta, sira la ba husu, se sira ezekuta barak no komprimisiu atu atu selu sei barak, sir abele bah usu, ne’e ‘nama lain dari’ orsamentu rektifikativu nebe booking tiha ona. 
.

Sem comentários:

Publicar um comentário

Nota: só um membro deste blogue pode publicar um comentário.