segunda-feira, 2 de setembro de 2013

“ONGV Fo Han Pasiente Ho Etu Maran”

.

Jornal Independente - Segunda-feira, 02 Setembru 2013 

Pasiente sira ne’ebe hetan tratamentu saude iha Ospital Nasional Guido valadares (HNGV) lamenta tebes ho etu ‘maran’ ne’ebe ospital oferese ba sira laiha modo been. 

Menu ai-han iha ONGV ba pasiente sira loron ida dala tolu kuaze maran hotu, dader pasiente sira simu paun no manu tolun fuan ida, meudia fo etu na’an karau no modo maibe been laiha, hanesan mos han kalan nian. 

Pasiente Josefina Nunes, lamenta tebes ho ai-han ne’ebe sira simu husi ospital, tanba ema moras lolos labele konsume hahan neebe laiha modo been. 

“Hau haree etu ne’ebe oferese husi ospital nasional ne’e hanesan ai-ahn ba ema saude diak, maibe la’os ema moras nian,” tenik nia, iha ONGV foin lalais ne’e. 

Ne’eduni nia husu ba Ministeriu saude no kompania ne’ebe fornese hahan atu hadia menu ai-han ne’ebe ospital fo ba pasiente sira atu bele sira iha vontade han hodi rekopera lalais sira nia saude. “ministeriu saude presiza haree asuntu ne’e ho seriu, tanba pasiente barak mak laiha vontade hodi konsume hahan ospital nian,” tenik Josefina. 

Iha fatin hanesan, pasiente ne’ebe lakohi publika nia naran dehan katak, durante ne’e sira simu ai-han maran deit, tanba ne’e pasiente barak laiha vontade han hahan hospital nia. “hahan ne’ebe sira lori mai ne’e kuaze maran hanesan de’it husi dader to’o kalan ne’ebe ami lakohi han, kadaves ami nia familia sira ma khan fali,” dehan nia. 

Ba kestaun ne’e, Diariu labele halo konfirmasaun ba Diretor Nasional (ONGV), tanba hetan despaixu husi Ministru saude atu la bele fo informasaun ba publiku. Entertantu, Deputadu Leonel Marcal husi Komisaun F parlamentu Nasional (PN) kontra tebes desizaun Ministru Saude, Sergio Lobo hodi bandu professional saude husi Nivel Diretor to’o xefe departementu atu lalika fo sai informasaun ba publiku atraves media no reprezetante povu iha uma fukun PN. 

“Regulamentu Ministru Saude hanesan fali nasaun ditadura, tanba bandu funsionariu labele koalia sai problema atendementu ruma akontese iha sentru ka klinika sira, so ministru deit maka bele hatene,” dehan nia. 

Nia dehan, foin lalais ne’e deputadu sira husi Komisaun F halo fiskalizasaun iha Distritu balun hare kareta roda ambulansia la diak, maibe sira taka deit no lakohi fo informasaun tanba la hetan autorizasaun.
,

Sem comentários:

Publicar um comentário

Nota: só um membro deste blogue pode publicar um comentário.