sábado, 19 de outubro de 2013

“Fatuk Boot Hanehan Uma Tolu, Na’in 6 Mate”

.

Jornal Independente - Sesta-feira, 18 Outubru 2013

Udan ne’ebe akompania ho anin boot mosu iha Suku Pairara, Sub Distritu Lautem, Distritu Lautem, halo fatuk boot ida iha foho leten monu tun hodi hanehan uma tolu, hamate ema nain 6 no nain 3 seluk hetan kanek todan.

Horseik, Kinta (17/10), maizumenus iha tuku 12 meudia, udan ho anin boot ne’ebe mosu durante minutu 15 resin konsege provoka dezastre naturais iha Aldeia Ira-cau, suku Pairara. Xefe Aldeia Lewonu-Pairara, Leodato Coreia informa udan ho anin boot ne’ebe mosu halo fatuk boot ida iha foho leten halai tun hodi haraun uma tolu.

Nune’e, nia informa, nain 4 mate kedas iha fatin, nain ida mate iha dalan bainhira lori ba Hospital Baucau, no nain ida seluk mate iha Hospital Baucau, hamutuk nain 6, vitima ne’ebe mate kompostu husi labarik nain lima no inan feto nain ida. Ba sira ne’ebe kanek, Leodato dehan, nain rua halao hela tratamentu saude iha Ospital Baucau no nain ida seluk iha Opsital Lautem.

 Entre nain haat ne’ebe mate iha fatin, nia hateten, susar atu hasai mate isin ida, Igilda Viana, tanba fatuk noot hanean, enkuantu mate isin seluk hasai ona maibe balun ho isin ne’ebe la kompletu.

“Matebian labarik ida nia ain kotu, no nia ain sei iha hela laran (Uma ne’ebe fatuk hanehan) no feto ida mos sei iha laran, mate tiha ona maibe susar atu hasai,” dehan Xefe Aldeia ne’e. tanba fatuk boot ne’ebe hanehan, prosesu muda fatuk mos para durante oras balun, hafoin loder seluk to’o mak kontinua fali no konsege hasai mate-isin maizumenus iha tuku 7 kalan.

Tuir sasin husi komunidade balun katak, bainhira udan hahu monu rai, familia ida-idak tama uma laran hodi xave odamatan.

“Derepenti lian maka’as mosu husi foho leten no teki-teki fatuk boot ida tuun hodi sama uma hirak ne’e,” dehan sasin ida.

Dadauk ne’e mate isin sira hatoba hela iha familia sira nia uma iha Ira-cau hodi halao prosesu funeral.
.

Sem comentários:

Publicar um comentário

Nota: só um membro deste blogue pode publicar um comentário.