quinta-feira, 17 de outubro de 2013

“Miss Timor Nakfilak Ba Miss Turizmu”

.

Jornal Independente - Kinta-feira, 17 Outubru 2013

Hafoin hetan kritika husi publiku kona-ba realizasaun Miss Timor-Leste 2013, Ministeriu Turizmu no Kultura (MTK) ‘nonok-nonok’ muda estratejia politika hodi troka naran Miss Timor sai Miss Turizmu.

 Iha fulan hirak kotuk, MTK trasa planu ‘kontraversial’ ida ho naran Miss Timor-Leste, planu ne’e lolos atu realiza iha fulan Agostu 2013, maibe tanba hetan reasaun kontra husi publiku, derepenti Miss Timor lakon.

 Durante fulan ida nia laran MTK hahu prepara estratejia foun ida ho planu ne’ebe nafatin, muda deit naran husi Miss Timor-Leste ba Miss Turizmu. Iha fulan Outubbru nee, MTK hahu ona prosesu apuramentu ba kontestante Miss Turizmu iha Timor tomak, prosesu ne’e halao durante semana ida, no dadaun ne’e kontestante nain 30, reprezenta kada Distritu nain 2, inklui Dili nain 6, tama ona iha faze audisaun nivel nasional. 

Ba estratejia foun ne’e, Organizasaun naun Govermental (ONG) Luta Hamutuk (LH) Konsidera MTK la merese atu realiza eventu Miss Turizmu. Diretor LH, Mericio Akara hatete lolos eventu hanesan ne’e entrega deit ba seitor privadu mak realiza, laos Ministeriu. Tanba, tuir nia bainhira Ministeriu mak buka organiza deit eventu no atividade serimonial sira hanesan Miss Turizmu, ne’e hatudu katak Ministeriu ne’e laiha valor ona.

“Governu nia responsabldiade mak hadia infra-estrutura turizmu, depois oinsa kordena ho Ministeriu sira seluk atu hadia dalan (estrada) hodi asesu ba fatin turistiku sira, hanesan dalan ba foho Ramelau, dalan ba Jaco Lospalos, dalan ba bee manas Marobo no seluk tan,” dehan Akara ba INDEPENDENTE iha Farol (16/10).

 Tuir Akara, Ministeriu ida labele sai fali ‘event organizer’ tanba event organizer ne’e grupo ki’ikoan ida hanesan setor privadu ida ne’ebe kria ekipa ruma hanesan Miss Turizmu, karavana no seluk tan.

Nia hatutan lolos, MTK iha servisu barak ne’ebe mak tenki halo, hanesan hadia uma ba turista sira, tanba turista sira nia vizita bele sai hanesan oasu ida atu promove TL.

Akara konsidera MTK kontinua implementa Miss Turizmu bazeia ba karakter husi lideransa mInisteriu nian ne’ebe gosta atu organiza deit maibe ninia benefisiu ba povu minim.
.

Sem comentários:

Publicar um comentário

Nota: só um membro deste blogue pode publicar um comentário.