quinta-feira, 17 de outubro de 2013

“PN Husu Fo Sansaun Makaas Ba Funsionariu Publiku Malandru”

.

Jornal Independente - Kinta-feira, 17 Outubru 2013

Deputadu Parlamentu Nasional (PN) husu atu fo sansaun maka’as ba fungsionariu publiku (FP) ne’ebe komete iha violasaun regra servisu, liuliu utiliza kareta estadu ba interese privadu hodi hatodan makina estadu.

 Vise Prezidenti parlamentu Nasional, Aderito Hugo da Costa hateten, KFP hanesan autoridade regulador ba funsaun publiku ne’ebe iha seridade no efisiensia ba fungsionariu publiku sira.

“Tenki regulariza no tau atensaun seriu ba ita nia fungsionariu publiku ne’ebe porvolta rihun 30 iha rai ida ne’e para servisu ho professional, efitivu no efisiensia inklui responsablidade,” dehan nia. Nia dehan, KFP tenki regulariza no tau atensaun seriu dixplina servisu kada fungsionariu no regular kalendariu padraun servisu kada loron inklui funsionariu uza kareta estadu.

 “Ami lamenta tebes ho makina estadu boot tebes ho rihun 30 funsionariu publiku, maibe iha eleisaun jeral buat barak la lao no administrasaun estadu mos barak la lao ne’ebe presiza autor regulador halo buat ruma,” tenik nia.

 Nia hatutan, presiza KFP regula funsionariu publiku seriu, liuliu fo sansaun tuir violasaun regra ne’ebe sira halo hodi servisu professional tuir regra no dixplina ne’ebe populasaun sira hakarak hein hela estadu TL.
.

Sem comentários:

Publicar um comentário

Nota: só um membro deste blogue pode publicar um comentário.