segunda-feira, 18 de novembro de 2013

“Dignidade Miss Turizmu ‘Monu’ Iha SKD”

.

Jornal Independente - Segunda-feira, 18 Novembru 2013

Ministeriu Turizmu no Kultura (MTK) hanesan la ses husi kontravensaun, hafoin polimika kona-ba eventu Miss Turizmu, dadaun ne’e ema balun hahu preokupa ho dignidade Miss hirak ne’ebe MTK produz.

Preokupasaun ba dignidade Miss Turizmu mosu husi uma fukun Parlamentu Nasional, deputadu sira la kontenti ho finalista Miss Turizmu balun ne’ebe simu bainaka iha centro Convenoes Dili (CCD) iha debate Publiku entre Primeiru Ministru Xanana Gusmao ho Mauk-Moruk, Segunda (11/11).

 Deputadu Manuel Guterres kestiaona Prezensa finalista Miss Turizmu balun iha CCD hodi simu bainaka. Tuir deputadu ne’e, simu bainaka laos parte husi promove Turizmu iha Timor Leste. Nia dehan, atu simu bainaka la presiza lori Miss sira, maibe buka ema seluk hodi halo serviso ne’e.

“Hau haree eventu debate publiku laiha ligasaun ho mis Turizmu sira tanba eventu politika, maibe mosu iha ne’eba Miss Turizmu sira mak simu tamu,” lamenta deputadu ne’e iha PN, foin lalais.

Manuel dehan, ida ne’e failansu husi MTK ne’ebe la fo responsabldiade ba Miss sira atu promove Turizmu iha TL.

Nia husu ba MTK atu responsabliza tanba eventu Miss Turizmu gasta osan estadu hamutuk rihun U$200 ho obzetivu atu promove turizmu no feto Timor Leste, la’os halo programa arbiru deit.

Iha fatin hanesan Deputadu Joaquim dos Santos dehan, dezde inisiu MTK faila ona, tanba la identifika area turiztiku no la haree didiak saida mak feto sira sei promove bainhira sai Miss.

 “Miss sira atu promove saida?,” nia husu. Ba kestaun ne’e Sekretariu Estadu Arte Kultura Isabel Ximenes hateten, nia parte esplika ona ba deputadu sira katak laiha Miss ida mak simu bainaka iha SKD.

“Hau ohin esplika ona ba deputadu sira katak, laiha ema ida mak forma Miss Turizmu sira atu simu bainaka,” dehan nia hafoin audensia publiku ho komisaun D iha PN, Kuarta (13/11).

Nia dehan, sira ne’ebe simu bainaka ne’e funsionariu MTK no funsionariu husi Ministeriu balun.
.

Sem comentários:

Publicar um comentário

Nota: só um membro deste blogue pode publicar um comentário.