segunda-feira, 18 de novembro de 2013

“Forsa Politika Dudu Xanana Ukun To’o Rohan”

.

Jornal Independente - Segunda-feira, 18 Novembru 2013

Forsa Politiku kontinua fo apoiu ba primeiru Ministru (PM) Xanana Gusmao hodi lidera Governu to’o nia mandatu remata.

V Governu Konstitusional mosu iha 2012 no nia tempo foin remata iha 2017, maibe PM Xanana dehan ona katak, nia sei rezigna aan iha 2015 husi nia kargu.

Hanoin xefe Governu nia ne’e la hetan suporta masimu husi forsa politiku balun iha rai ida ne’e, inklui partidu Fnreti-Mudansa.

Membru parlamentu nasional husi bancada Frenti-Mudansa Maria Adolzina Pires dehan, nia grupu husu atual xefe Governu hodi hanoin didiak molok foti desizaun final kona-ba nia pozisaun nu’udar Primeiru Ministru.

Nia dehan, luta ba ukun rasik aan ihab pasadu ne’e prosesu kleur no populasaun balun sei trauma ho funu ne’ebe sira hasoru durante okupasaun Indonesia tanba ne’e Presiza tebes PM Xanana kontinua sai esperansa ba povu no nasaun ida ne’e to’o 2017.

Maria dehan, iha lideransa PM Xanana nian, governu halo buat diak barak ona ba povu. “Ami haree ba estabildiade, dezenvolvimentu no seguransa TL (Timor Leste) ne’ebe diak ona tanba ne’e ami apoiu no suporta nafatin PM Xanana atu kontinua to’o mandatu hotu iha 2017 hodi prevene situasaun instabildiade iha TL,” nia dehan.

Entertantu, membru bankada Partidu Demokratiku (PD) Virgilio Hornai haree katak, lia fuan atual Xefe Governu ne’ebe dehan atu rezigna an ne’e hanesan tranzisaun deit atu halo transferensia pasifiku.

Maibe, nia hateten, nia parte konsidera Xanana hanesan lider rezistensia ne’ebe iha responsablidade ba nasaun no dezenvolvimentu iha futuru.

 “Ita rona estetmenu PM Xanana ne’e hanesan tranzisaun atu halo trasnferensia poder ho pasifiku, ami senti ida ne’e mak sira buka hodi kontribui iha liur deit hodi entrega ba lideransa foun,” dehan nia.

 Nune’e, Deputadu husi Bancada FRETILIN, Inacio Moreira dehan, importante liu atu halo mak kada Timor oan tenki servisu maka’as hodi dezenvolve ita nia rai.

Deputadu Aderito Hugo da Costa husi CNRT, dehan idea Primeiru Ministru nia hodi rezigna an ne’e fo benfisiu ba interese nasional nian, tanba bele fo poder ba jerasaun foun hodi kaer ukun.

Nia afirma, se karik Primeiru Ministru mak rezigna an iha 2015, sei la fo impaktu ba estabildiade TL, tanba Xanana sei kontinua fo apoiu no orienta nafatin ba jerasaun foun sira hodi hametin paz no estabilidade hodi dezenvolve Timor-Leste.
 .

Sem comentários:

Publicar um comentário

Nota: só um membro deste blogue pode publicar um comentário.