sexta-feira, 8 de novembro de 2013

Polemika Xanana-Mauk Moruk, “Familia Daitula Kontribui Ho Estadu”

.

Jornal Nacional Diario - Kinta-feira, 07 Novembru 2013

Polemika no diverjensia opinoens ne’ebe reafirma husi lider rezistensia atual Primeiru Ministru (PM) Kay Rala Xanana Gusmao ho Komandante vermelha FALINTIL, Paulino Gama ‘Mauk Moruk’, sai ona preokupasaun povu tomak nian.

 Loron ba loron polimika ne’e dada tiha fali hanesan boraisa, ne’ebe da’et to’o ona Saudozu Sub Xefe Estadu Maior das FALINTIL, David Alex ‘Daitula’ nia peregrinasaun rezistensia to’o hetan kapturasaun husi tropas Indonesia iha tinan 1997, maibe, familia saudozu Daitula nian hol apozisaun atu lakohi mete no tau kanoru tohar ba polemika ne’e.

 Familia saudozu Daitula nian husu deit ba lideransa sira atu hatudu nafatin domin ba malu hodi rezolve sasan hotu pasadu nian ho ulun malirin. Iha semana hikus ne’e, PM Xanana Gusmao hasai deklarasaun hodi dehan, Mauk Moruk hamutuk ho tropas Indonesia mak halo asaltu ba David Alex (1987).

Nune’e husi sorin balun, Mauk Moruk mos foti kedas reasaun hodi dezmente total Xanana nia akuzasoens sira ne’e, maibe, familia saudozu daitula nian la hola pozisaun atu deside apoia pesoal Xanana ou Mauk Moruk. Ba sira (Familia saudozu Daitula-red) importante liu mak kontinua fo nafatin kontribuisaun ba estadu ho governu atu bele buka meus politiku hotu hodi solusiona problema social, ekonomia no juztica ne’ebe hafutar hela povu kiak sira nia moris loro-loron.

“Ami lakohi tau kanoru tohar ba polemika ne’e, ho ami nia aman sira nia mate, mate nakfilak ona ba rai, Timor sai hanesan nasaun soberania ida iha mundu, tanba ne’e, ami familia saudozu Daitula nian hamrik nafatin hodi fo apoiu no kontribuisaun ba estadu ho governu hodi bele liberta lalais povu ida ne’e husi nakukun, hamlaha, hamrok, kiak no mukit,” afirma saudozu daitula nia ona mane, Alarico Napeleao ‘Daitula’ hodi responde JNDiario iha nia servisu fatin, Kuarta (6/11).

Alarico mos husu ba lideransa sira hotu atu labele politiza saudozu sira nia mate sai hanesan instrumentu politiku ba interese politiku, tanba ne’e, familia saudozu daitula nian fiar katak, Justisa ba saudozu sira sei tau iha realidade atu bele fo garante ida ba povu Timor Leste nia istoria no povu nia kontribuisaun ba harii nasaun no estadu ida ne’e.

 “Hau fiar katak, buat ne’ebe PM Xanana deklara ne’e realidade istoria ida, tanba ne’e, ami familia pronto kontribui nafatin ho estadu no governu atu buka lia los no justisa baa mi nia aman nia mate,” Hateten Alarico Daitula.

Kona-ba funu naruk Timor nian to’o hetan ukun rasik an ida ne’e, Alarico fo sasin katak, povu ne’e hatene momos istoria no presonalidade lider rezistensia sira ne’ebe mak terus hamutuk ho sira tinan 24 nia laran hodi luta ba ukun rasik an. “Povu seidauk nega PM Xanana mak lidera funu ida ne’e no povu mos la nega Mauk Moruk nia kontribuisaun, maibe, atu diak liu Mauk Moruk ho xanana lalika hatudu liman ba malu, maibe kolabora malu atu oinsa mak hamutuk dezenvolve rai ida ne’e no lori povu ne’e sai husi kiak no mukit nia laran,” hateten Alarico Daitula.

Nia hatutan, Povu ida kiak ne’e duni mak tane no foti naran Boot Kay Rala Xanana Gusmao nian, tanba ne’e la presiza atu inventa tan istoria hodi ignora no dezmoraliza malu, tanba deit buat laek balun, ne’ebe bele lori konsekuensia boot ba povu nia moris hakmatek.

 “Hau bele garante katak, PM Xanana laos foin mak naran boot iha rai ida nee, nia (Xanana-red) duni mak lidera funu ida ne’e no fo orientasaun baa swain FALINTIL sira hodi rezite funu naruk ida ne’e to’o povu ne’e termina nia destinu ukun rasik an, liu husi konsulta popular 30 Agusto 1999,” Alarico fo sasin.

 Nia lia tun tan dehan, Se Mauk Moruk hakarak ho domin duni atu kontribui ba povu ida ne’e nia moris diak, tuur hamutuk holider politiku sira seluk, atu fo hanoin ba malu, oinsa mak halo planu no estratejia ba dezenvovlimentu nasional.

Atu dehan deit katak, la presiza ona no la’os ona tempu atu ke’e malu no sura kolen ba malu, hodi dehan, nia mak luta liu no nia mak mestre ba funu ida ne’e.

“Ami povu ki’ik no oan kiak ba funu ida ne’e, presiza pas no moris diak, ita lalika lori manobra oi-oin atu mai haterus tan povu terus nain ne’e,” hateten Alarico.

 Nia dehan, Povu nee hatene se mak Xanana Gusmao no se mak lidera funu durante tinan 24 nia laran, ne’e duni, lalika inventa istoria, se hakarak ona atu tetu iha dasi, se mak halo funu no lae, Alarico husu ba veteranu sira ne’ebe mak reziste durante tinan 24 iha ai laran, atu hatudu matoridade politika ho moral hodi organiza inkontru boot ida atu deklara hodi hasai lia los no hatudu faktu ba povu katak, se mak orienta no lidera povu ida ne’e to’o ukun rasik an.

 "Hau hakarak fo lembra fali deit ba ita tomak katak, uluk iha tempu difisil nia laran, povu ida ne’e hakilar Viva Xanana, maibe ohin loron, tanba deit poder, ema balun haluha tiha no tenta dezvaloriza tiha Xanana hanesan fali traidor boot ida, ida ne’e la bele akontese,” afirma Alarico Daitula.
.

Sem comentários:

Publicar um comentário

Nota: só um membro deste blogue pode publicar um comentário.