sexta-feira, 8 de novembro de 2013

Xanana Vs Mauk Moruk “PR Taur Sei Sai Mediador Hodi Rezolve”

.

Jornal Nacional Diario - Sesta-feira, 08 Novembru 2013 

Xefi Estadu das FALINTIL-Forsa Defeza Timor Leste (F-FDTL) Maijor Jeneral (Maijen) Lere Anan Timur, informa katak, iha tempu badak Prezidenti da Republika (PR) sei sai mediador hodi rejolve problema entre komandante em Xefi da Luta Libertasaun nasional actual primeiru Ministru (PM) Kay Rala Xanana Gusmao no eis komandante brigada vermelha Paulino Gama “Mauk Moruk” atu nune’e publiku bele hela ho klareza. 

Tuir Maijen Lere katak, Primeiru Ministru Kay Rala Xanana Gusmao haruka ona karta ba Prezidenti da Republika atu bele sai mediador hodi konvida Mauk Moruk nune’e bele halo debate ida para halos tiha historia ba jerasaun foun sira. 

“Simi, hau hanoin katak, Sr. Primeiru Ministru haruka ona karta mai iha Prezidenti da Republika husu para halo konvokatorio ka konvite ida ba sira ne’ebe ke atu tur hamutuk ho Mauk Moruk ba debate. 

Debate ne’e la’os atu dehan katak ida ne’e sala, ida ne’eba mak loos, debate ne’e atu hanesan katak atu hatudu liu-liu ba jerasaun foun katak istoria ita nia funu ne’e hanesan ne’e, mais hau hanoin katak ita nia maun Mauk Moruk mos iha despozisaun diak ba debate ho ita nia maun boot Primeiru Ministru,” informa maijen, Lere ba Jornalista sira iha Palacio Prezidensial Aitarak laran, Dili, Kinta (07/11) hafoin hala’o enkontru ho Prezidenti Republika, Taur Matan Ruak hodi informa situasaun no servisu F-FDTL nian ba xefe estadu. Eis Gerileiru ne’e hatutan katak, asuntu ne’ebe koalia sai manas tiha entre PM Xanana ho Mauk Moruk ne’e relasiona ho tempu rezistensia nian, tanba ne’e asuntu ne’e hanesan maun alin mak haksesuk malu. 

“Situasaun entre ita nia maun boot nain rua, Katuas Xanana ho katuas Mauk Moruk hau hanoin katak, ne’e hanesan maun alin maka sira nain rua haksesuk malu, asuntu ne’ebe mak imi akompania hau hanoin katak asuntu kona ba funu, libertasaun nasional ninian, laos kona ba dezenvolvimentu nasional ukun-an nia laran,” dehan Maijen Lere. 

Tuir Eis Gerileiru, actual Xefe Estadu das F-FDTL ne’e katak,” se iha problema, podia nia impaktu ne’e ba iha ita nia libertasaun nasional maibe la afeita mak agora ita ukun-an ona ne’e no agora sira hakarak halo moris fila fali”. 

 Ho situasaun ne’e Maijen Lere hatutan katak, laiha impkatu ba situasaun maibe tuir nia katak, komunidade no joventude la kompriende prosesu sira ne’e bele senti tauk ka trauma, tamba ne’e zefe Estadu das F-FDTL konsidera katak, ne’e laiha problema tanba iha demokrasia ema hotu iha direitu atu bele espresa nia hanoin no hakarak. Maske nune’e demokrasia la signifika katak, ida-idak hala’o konforme nia hakarak rasik maibe tenki tuir lei ne’ebe vigora iha Timor Leste. Relasiona ho asuntu ne’e, Maijen Lere mos husu ba politiku sira no jornalista sira atu labele sukit para hatauk komunidade. 

“Naran ita nia maluk politiku sira, imi jornalista sira labele hanesan lian Portugues karik dehan adisador, sai esklaresedor no edukador ba ita nia komunidade tanba dala ruma hau lee jornal sira ne’e ita lee ba titlu ne’eba ne’e ita tauk ona, mas labele hanesan ne’e,” Maijen Lere husu. 
,

Sem comentários:

Publicar um comentário

Nota: só um membro deste blogue pode publicar um comentário.