segunda-feira, 2 de dezembro de 2013

PM Xanana Alerta Koidadu Ho KR “Fo Ordem Ba PNTL Halo Auto Stop Iha Distritu 13”

.
Jornal Nacional Diario - Segunda-feira, 02 Dezembru 2013

Primeiru Ministru nu’udar mos Ministru Defeza no Seguransa, Kay Rala Xanana Gusmao, Domingu (1/12), halo alerta ida ba Administrador hotu, inklui Komandante Polisia Nasional Timor Leste (PNTL) iha Distritu 13 nia laran, atu matan moris no neon nain ho Konselhu Revolusaun (KR), tanba tuir Xanana, Konselhu Revolusaun ne’e hakarak estraga estabilidade.

 Liu husi sorumutu ho Administrador Distritu 13 no Komandante PNTL husi Distritu tomak iha salaun Xanana Sport center, PM Xanana reafirma ba Komandante PNTL hotu ho Administrador Distritu 13 atu kuidadu ho situasaun Konselhu Revolusaun nian, ne’ebe iha intensaun hakarak estraga estabilidade. Xanana hateten, labarik balun hatene revolusaun ne’e kala diak tebe-tebes,” se ita koalia kona ba revolusaun ida uluk ninia, sira oho ema ida de’it mos la keixa, mas, hau hanoin revolusaun ida ikus-ikus ne’e, iha rai barak halo dadauk, ida ne’e halo susar boot povu,” afirma PM Xanana.

 Xanana realsa, revolusaun A ou B hakilar demokrasia la hatene hodi organiza malu no depois mak mundu ohin loron ne’e hakilar katak, labarik sira refuziadu no la hetan edukasaun.

 “Hau mos ba fali Jakarta International Dialog on Defense, hau sei hakilar ba mundu katak, se rai sira ne’ebe fo kilat ho demokrasia hodi halo funu, rai sira ne’e mak tenke hare ba refujiadus, laos ema seluk,” tenik PM Xanana.

 Xanana lia tun mos dehan, ikus-ikus ne’e nia rona isu-isu katak, koamdante Polisia balun iha Distritu hakarak fasilita transporte ba grupo balun hodi halo revolusaun. “Imi hakarak revolusaun imi sai tiha husi Polisia, se administrador sira hakarak revolusaun sai tiha husi administrasaun, tanba ita atu temi revolusaun hakarak saida,” dehan PM Xanana.

Nia esplika katak, revolusaun Marxista sira nian dehan, kuandu ema bok an bele hasai ema nia vida, ne’e revolusaun ida tidan tebes no atu rekopera kanek todan no estuda tenke hasa’e osan.

 “Ita atu sobu (destroy) ne’e fasil, maibe atu hadia no harii fali ne’e lori tempu naruk, hau bolu atensaun ba ita boot sira admin istrador atu kopera didiak ho komandante Polisia Distritu nian hodi bolu jovens sira partisipa iha Natal no Tinan foun ho didiak no iha dame nia laran,” PM Xanana alerta tan.

Iha biban ne’e, PM Xanana Gusmao mos fo orden ba Polisia iha Distritu 13 atu kontinua halo auto stop (cek Point) ba kareta ho motor sira ne’ebe mak halo movimentu Distritu laran, inklui iha Dili laran.
.

Sem comentários:

Publicar um comentário

Nota: só um membro deste blogue pode publicar um comentário.